Profils da program e custs per emissiuns tar RTR (2016)

RTR stat en servetsch da la publicitad – cun sia purschida multifara e da gronda qualitad, ma era sco interpresa finanziada principalmain dal maun public. En il senn da la transparenza preschenta RTR ils custs da sias emissiuns da televisiun ed ils custs dal Radio Rumantsch.

Chasa da medias RTR Bild in Lightbox öffnen.

Legenda da maletgs: Profils da program e custs per emissiuns tar RTR Chasa da medias RTR RTR

Custs per emissiuns – quai mussa RTR

En la preschentaziun dals custs s’orientescha RTR vi da las expensas che stattan directamain en connex cun la producziun d’ina emissiun. Latiers tutgan ils custs per prestaziuns redacziunalas dal persunal e per la tecnica da producziun, lura custs per cumprar programs ed era per meds da producziun sco p. ex. studios, cameras e microfons u plazs da montascha.

Tar producziuns da televisiun han differents facturs gronda influenza sin ils custs, uschia ch’ils custs per emissiuns pon variar considerablamain era entaifer singuls geners.

Tar quests facturs tutgan:

  • Moda e maniera da la producziun (atgna producziun, co-producziun u producziun estra; producziun en il studio u dadora; live u preproducida)
  • Lavur per ina producziun (planisaziun, retschertga, cumplexitad d’ina producziun)
  • Dumber da las emissiuns (dumber d’episodas ad onn; format quotidian u da l’emna, emissiun singula)
  • Durada da l’emissiun

Tar la chadaina da radio «Radio Rumantsch» vegnan ils custs per l‘infurmaziun preschentads separà.

Tar las indicaziuns avant maun sa tracti dals custs effectivs per las emissiuns da l’onn 2016, sa basond sin il quint annual. En l’avegnir vegnan las datas actualisadas mintg’onn, adina suenter ch’il rendaquint è avant maun.