La davosa fin d'emna d'avust daventa Mustér in lieu d'inscunter per fans da musica. L'Indoor Sounds procura cun artistas, artists e bands naziunalas ed internaziunalas per dus dis plain musica e divertiment.
Era RTR è da la partida: Tar nossa photocab da 360° han tut las visitadras e tut ils visitaders la pussaivladad da far ensemen cun amias ed amis cools videos, in'experientscha speziala amez la festa. Nus ans legrain sin numerusas visitas!
Ussa scuvrir tut ils videos da 360°:
Indoor Sounds è la nova versiun per l'enconuschent Indoor Festival. In nov num ed in nov temp. Quai cun las experientschas da l'anteriur festival ch'era il matg, in temp cura che nagut marscha tenor Florian Zanin ch'è il manader dal comité d'organisaziun da l'Indoor Sounds. E midà haja era la direcziun musicala da las duas sairas. Enstagl da hip hop e rock aud'ins ussa rock e pop.
900 entradas per esser sin buna via
Quest onn lavura l'Indoor Sounds cun in budget da 160'000 francs. Per cuvrir ils custs da las duas sairas ston ils organisaturs cuntanscher 900 entradas pajadas.
Duas terzas dals custs che nus avain èn expensas per bands e tecnica.
Per organisar l'entira occurrenza dovri lavur che dura bler u pauc durant nov mais. Avant, durant e suenter l'arranschament èn lura radund 50 persunas engaschadas. Ed era questa giada hajan ils organisaturs la fin finala d'ir sur ils cudeschs, e lura ponderar co vinavant, di Florian Zanin cun avair il budget en chau.
