Tge consequenzas ha l’erupziun dal Tambora gì en il Grischun? E cun tge strategias han noss perdavants survivì «l’onn senza stad» 1816 e «l’onn da fom» 1817? Sin basa da funtaunas istoricas ed acts da dretgira anc betg enconuschents, dattan l’istoricher Adolf Collenberg e l’archivar Tarcisi Hendry respostas.
Docu-drama ensemen cun teater da Rueras
En scenas fictivas – giugadas d’acturas ed acturs da la cumpagnia da teater da Rueras e conturn, lascha il film reviver il mintgadi en la sumbriva dal Tambora. En il focus stat la sort dals dus paupers delinquents Onna Maria Beer e Remigi Curschellas – omadus Tuatschins, omadus vegnids truads a la mort pervi dad enguladitschs da vivonda.
Erupziun cun consequenzas mundialas
L'erupziun è la pli gronda dals davos 20'000 onns. L’avrigl 1815 explodescha il vulcan Tambora en l’Indonesia. Da quai da 120’000 persunas vegnan per la vita immediat u entaifer curt temp.
Dentant era il rest dal mund patescha fitg da l’erupziun catastrofala. La tschendra ch’il Tambora bitta en l’aria sa derasa sur l’entira emisfera dal nord, stgirenta il sulegl e fa sumbriva sin terra. Il clima mundial sfradenta per dus grads.
Il 1816 èsi dapertut en l’Europa fraid e bletsch. En il Grischun na datti betg in mais senza naiv. Las racoltas èn miserablas. I suonda in’enorma chareschia ed il 1817 la gronda fomaz.
RTR Cuntrasts 22.10.2017 / RR actualitad 11:45