Premiera da film a Casti - Brinzauls

Il film da Stefan Dobler «Responsabladad al limit – in onn cun Daniel Albertin» accumpogna il president communal durant il davos onn. In vair carussel d’emoziuns. A muments da plaschair suondan muments da nunchapientscha. I passa betg in di, che Daniel Albertin na sto betg sa fatschentar cun Brinzauls. Il film dat in’invista davos las culissas. El mussa muments da Daniel Albertin sco president communal e muments en sia vita privata – là, nua ch’el vegn a forzas.

Impressiuns dals films

En il segund film da Claudio Spescha, en collavuraziun cun Sara Hauschild «Bandunar e spazzar – u turnar e restar?» vai per la dumonda: Quo vadis Brinzauls? Bleras abitantas e blers abitants na vulan betg pli star a Brinzauls ed han suttascrit per ir davent. Auters spetgan cun brama da turnar suenter l’evacuaziun. Il dilemma da Brinzauls è in enorm pais e sveglia grondas emoziuns. Entant che la muntogna smanatscha cun sfessas e sfendaglias, va in foss tras il vitg evacuà. La cuminanza dat dapart. Persunas pertutgadas ed autoritads discurran davart temas, quitads, speranzas e schliaziuns.