1925 - 1959

Ils emprims pass dal Radio Rumantsch (RR)

1925

Ils 17 da schaner vegn emessa l'emprima contribuziun dal Radio Rumantsch. La contribuziun è vegnida emessa da l'emettur «Hönggerberg», ch'è vegnì mess en funcziun ils 23 d'avust 1924 sco prim emettur puramain da radio en Svizra. L'iniziant da quest'emissiun è Felix Huonder. Il medem onn suondan anc quatter ulteriuras emissiuns.

1927

L’onn 1927 vegn deditgà in entir program da la saira a «l'Uniun rumantscha da Turitg». L'entir arranschament vegn transmess per rumantsch.

1935

L’onn 1935 vegn emessa l'emprima pregia rumantscha.

1938

Ils 20 da favrer renconuscha la populaziun svizra il rumantsch sco linguatg naziunal cun 574'991 cunter 52'827 vuschs. En quest connex vegnan emessasdiversas emissiuns.

1940

Entschatta da la cronica rumantscha, in'emissiun davart la vita e la lavur dals Rumantschs, per ils auditurs da linguatg tudestg.

1943

Entschatta da las emissiuns rumantschas regularas. Quellas vegnan emessas adina l'emprim venderdi dal mais. Tgiradas vegnan ellas da dr. Adolf Ribi.

1954

La societad purtadra CRR (Cuminanza rumantscha radio e televisiun) vegn recepida en la SSR. En l'emprim rapport annual 1953/54 vegnan menziunadas las suandantas emissiuns: emissiuns da las nov, uras d'uffants, pregias e cronicas rumantschas in lingua tudestga.

1955

L’emprima contribuziun da «Radioscola» cun il titel «Las cristallas» da pader Flurin Maissen vegn emessa ils 27 da schaner. Il medem onn suonda anc ina segunda emissiun da Jon Vonmoos: «Las funtanas mineralas da Scuol e Tarasp». Quest onn èn tranter auter era vegnids emess dus gieus auditivs: «L'ura da Frederic il Grand» da Men Rauch e «Ramora» da Leza Uffer.

1959

Sco prim tgirader da program en uffizi cumplain e cun domicil e plazza da lavur en il chantun Grischun vegn Tista Murk, da lezzas uras president da la CRR, engaschà. Ils 9 d'october datti l'emprima emissiun «Viagiond cul microfon» da Tista Murk, in'emissiun d'infurmaziun d'ina mes'ura l'emna.