1970 - 1979

Dapli emissiuns per il radio e la televisiun rumantscha.

1971

Nov en il program: «La vusch retica», in'emissiun per ils Rumantschs a l'ester. Ella vegn derasada en il Radio Internaziunal.

1972

Il Balcun Tort vegn emess mintga trais emnas, fin 18 emissiuns l'onn, el cuzza mintgamai 30 minutas. Ils onns suenter s'augmenta il temp d'emissiun anc a 40 fin 45 minutas. Mintga sonda saira emetta la televisiun l’Istorgina da buna notg en rumantsch. L'emissiun «Ord il Parlament federal» rapporta quatter giadas l'onn da la lavur da noss parlamentaris a Berna. Entschatta da las «Novitads» che vegnan emessas durant 10 minutas da glindesdi fin venderdi. Las «Novitads» èn l'emprima emissiun rumantscha che vegn derasada en l'entira Svizra.

1973

Testas Finas, in quiz per scolar(a)s, vegn integrà da nov en il Balcun Tort ed emess quatter giadas ad onn.

1974

L'Istorgina da buna notg en rumantsch vegn emessa duas giadas l'emna (mardi e sonda).

1975

Per levgiar la lavur dal manader dal post da programs stgaffescha la CRR il ressort Televisiun Rumantscha ed elegia Giusep Decurtins sco manader.

1976

Dals 21 fin ils 30 da matg festivescha l'exposiziun «HIGA» ses 20avel anniversari. Cun quell'occasiun èn preschents er ils Rumantschs cun in studio. Da quest studio vegnan transmessas passa 70 contribuziuns. Ils 23 d'october vegn avert uffizialmain il post da program a la Via dal teater 1 a Cuira.

1977

Il Balcun Tort vegn emess mintga quatter emnas, pia 12 fin 13 giadas l'onn, mintgamai durant 45 minutas. Quai è ina reducziun da las emissiuns rumantschas.

1978

Ils 23 da november datti in plan da structura nov da las emissiuns rumantschas. Il program vegn schlargià e restructurà.

1979

Ils 7 da schaner vegn emess Contacts, il gieu tranter duas vischnancas, per l'emprima giada.