2000
Il viadi d'auditurAs dal RR maina a Barcelona. En l'Engiadin'Ota ha lieu la 6avla Scuntrada Rumantscha (16 fin 20 d'avust 2000) e suenter la segunda festa svizra dals arts. Tar omadus arranschaments è RR il partenari da meds da massa. Ina davosa retschertga al telefon, fatga dal servetsch da perscrutaziun da la SRG SSR idée suisse tar la populaziun rumantscha dal Grischun conferma buns resultats. Da nov vegn introducì cun Radio Control, l'ura che taidla radio, in sistem nov per mesirar il diever dal radio en Svizra.
Contribuziuns da la Televisiun Rumantscha surpassan ils agens cunfins culturals e vegnan registradas a l'exteriur. L'emprim film da kino rumantsch «Increschantüm» realisà cun la TvR chatta in grond public a Turitg.
1999
L'unitad d'interpresa rumantscha da la SRG SSR idée suisse occupa 100 collavuraturas e collavuraturs. L'emissiun per la giuventetgna, il «battaporta», festivescha ses 15avel anniversari. Sin la rait da la viafier retica circuleschan la «Tujetsch» e la «Savognin», duas locomotivas novas, modernas cun ils logos e las colurs dad RTR. RR organisescha cun success per l'emprima giada in viadi d’auditurAs a Prag.
Mintga di Telesguard sin SF DRS a las 18.45, dapi ils 23 d'avust. Cun quai è vegnida cuntanschida ina gronda finamira, mintga di ina fanestra rumantscha en la televisiun svizra. Recrutar e scolar redacturAs da televisiun rumantschAs è ina gronda sfida per la pitschna redacziun a Cuira.
1998
Radio e Televisiun Rumantscha han logos novs ed èn daventads ina marca en il Grischun. La communicaziun e la strategia da vendita vegnan extendidas ed il studi da la retschertga tar l'auditori mussa buns resultats: la populaziun rumantscha taidla bler RR. En collavuraziun cun il cussegl dal public da la CRR vegn discutà il diever dal rumantsch grischun, il linguatg rumantsch scrit, er sco linguatg discurrì. RG vegn considerà sco pauc adattà per il microfon. Las audituras ed ils auditurs s'identifitgeschan cun ils idioms rumantschs tradiziunals.
Cun il film da la televisiun «Paun jester ha siat crustas» da Christian Schocher creescha la TvR ina contribuziun che chatta gronda attenziun. En la pausa da stad visita la TvR 7 vischnancas en la regiuns rumantschas ed organisescha l'«Open air-kino» cun atgnas producziuns.
1997
Radio Rumantsch survegn ina frequenza sin il satellit Astra ed è cun quai da recepir sco radio d'ina minoritad en tut l'Europa. Cun 4870 uras radio l'onn vegn extendida l'offerta da program anc ina giada. Tranter ils 10 ed ils 15 d'avust sa participescha RR a la 5avla Scuntrada Rumantscha a Domat e sa preschenta in'emprima giada sin internet.
Las emissiuns da televisiun rumantschas vegnan guardadas bler er da la populaziun da linguatg tudestg, grazia als suttitels da Teletext. La TvR sa participescha per l'emprima giada als dis da film da Soloturn, suenter che l'emissiun Cuntrasts pussibilitescha da realisar er documentaziuns e contribuziuns mono tematicas.
1996
In onn da giubileum per ils meds electronics rumantschs. Nossa societad purtadra, la Cuminanza Rumantscha Radio e Televisiun (CRR), po festivar ils 12 d'october 1996 ses 50avel anniversari.
L'emissiun Dumondas da... vegn remplazzada da Controvers. In redactur da la Televisiun Rumantscha (Gieri Antoni Caviezel) maina ina discussiun cun pliras persunas davart in tema actual. Realisada vegn l'emissiun en il studio da la chasa federala a Berna.