2005
Mariano Tschuor daventa schefredactur da RTR, resta dentant manader da la TvR. Al schefredactur suttastat l'entir sectur da l'infurmaziun d’actualitad da RTR. Cun quella decisiun vul RTR unir las redacziuns d'infurmaziun da RR e TvR – e rinforzar la posiziun publicistica RTR sco chasa da medias ferma en il Grischun.
En il rom d'in nov plan da structura da SF ha la TvR da midar il temp d'emissiun dal Telesguard da las 18.45 sin las 17.45 uras. Da l'autra vart datti danovamain pliras repetiziuns sin SFinfo, in augment dal temp d'emissiun per mintga ediziun (almain 10 minutas) ed ina ediziun supplementara la sonda.
In eveniment spezial ed in'emprima producziun cuminaivla da RR e TvR è stà il Raiffeisen Festival da Chors. Per l'emprima giada en sia istorgia ha la TvR producì e realisà in'emissiun live da 90 minutas or dal studio 1 a Turitg, ils 29 da matg 2005. La concurrenza da chantar organisada da RTR e da la Lia Rumantscha ha durà 5 mais ed ha procurà per salas polivalentas plainas en l'entir chantun Grischun.
2004
En il decurs da l’emprim mez onn vegn l’offerta dal RR restructurada cumplettamain. L’infurmaziun ed il program accumpagnant vegnan mess ensemen, las squadras da lavur cumponidas da nov, il program dal di regruppà en trais blocs. Differentas emissiuns han novas furmas e novs cuntegns. Las emissiuns d’infurmaziun vegnan amplifitgadas («Oz a las ...»), la moderaziun modernisada, il program da musica adattà. «Echo der Zeit» dad SR DRS vegn integrà ed emess a partir da las 18:30.
La direcziun generala da la SRG SSR sancziunescha il project per in augment dal RR. La finamira per ils proxims onns: realisar RR 24, in program da radio da 24 uras.
La primavaira vegn mess il crap da fundament per il nov center da medias SRG SSR/RTR.
Redesign dal logo RTR cun ina grafica che marchescha l’unitad dad RTR, RR e TvR.
2003
L’Engiadina vegn elegida da la SRG SSR sco regiun da pionier per introducir la distribuziun da televisiun digitala DVB-T.
RTR decida da realisar ina atgna infrastructura tecnica per la producziun da televisiun. Fin uss vegniva la producziun fatga dad interpresas ordaifer RTR.
La partiziun IT dad RTR crescha uschia considerablamain.
Emprimas paginas rumantschas sin teletext TXT.
2002
Sin proposta dad RTR decida il directori CRR ina reorganisaziun da las structuras organisatoricas e da program dad RTR.
RTR lantscha «TGI CHE SA RUMANTSCH SA DAPLI» sco nov slogan.
A partir da l’avust ha la Televisiun Rumantscha TvR per l’emprima giada in correspundent stabel per l’Engiadina e la Val Müstair ed in studio da correspundent a Scuol. Armon Schlegel è l’emprim «videojournalist» da la TvR. El filmescha, taglia, sonorisescha e transmetta la producziun finida a Cuira.
L’october vegn plazzà in correspundent dal RR a temp cumplain en il Grischun central cun sedia a Savognin.
Peter Egloff, dapi 1996 manader ed innovatur da la TvR, banduna RTR. Mariano Tschuor mida dad SF tar RTR sco nov manader da la TvR a partir da 2003.
2001
L’emprim da settember 2001 surpiglia Bernard Cathomas la direcziun da Radio e Televisiun Rumantscha. Quest onn vegn era lantschà la planisaziun da la nova Chasa RTR.
