Siglir tar il cuntegn

Header

Passants che guardan en da las fanestras dal studio da moderaziun da radio da la nova Chasa RTR.
Legenda: Chasa RTR la saira. RTR
cuntegn

Istorgia 2010 – 2006

Nov center da medias per RTR

2010

Il Minisguard: in magazin d'infurmaziun per uffants

Minisguard sa numna la nova emissiun da televisiun dad RTR per uffants. Mintga sonda a las 17.40, e scorepetiziun la dumengia a las 17.15, survegnan ils uffants ina survista da quai ch'è succedì en lur regiun, en il chantun, en Svizra ed er a l'exteriur. Las redacturas ed ils redacturs elavuran temas relevants da politica, cultura e sport uschè ch'uffants da la scola primara pon suandar. Minisguard remplazza l'istorgina da buna notg (davosa emissiun 27-12-2009) ch'è stada durant plirs decennis e per pliras generaziuns in punct fix la dumengia saira.

Logo dal Minisguard cun si dus capricorns designads.
Legenda: Logo dal Minisguard. RTR

Accents – ina gasetta da chasa per RTR

Il cumenzament da mars è cumparida l'emprima ediziun da la gasetta da chasa RTR e da la societad purtadra SRG.R cun il titel Accents. Accents duai far punt tar collavuraturas e collavuraturs da RTR e punt tar persunas-clav da la societad civila rumantscha e tar persunas attaschadas a RTR. La gasetta cumpara quatter giadas ad onn.

Header da la gasetta Accents cun il logo da RTR.
Legenda: Gasetta Accents. RTR

Las-Alps-infoteca – La chasa da medias da las Alps

RTR lantscha ils 27 d'avrigl in project cun il titel Las-Alps-infoteca. La finamira è d'installar a Cuira in center da cumpetenza per ils meds da massa da las Alps. Las-Alps-infoteca elavura temas che fatschentan la glieud en l'entira regiun da las Alps. I vegn creà ina rait da collavuraturAs da medias e dad experts che porschan quests temas al public. Las-Alps-infoteca duai daventar la Chasa da medias da las Alps.

Logo da Las-Alps-infoteca – La chasa da medias da las Alps.
Legenda: La chasa da medias da las Alps. RTR

2009

Mariano Tschuor daventa nov directur
A partir dal matg 2009 è la direcziun da Radio e Televisiun Rumantscha RTR en ils mauns da Mariano Tschuor. El è il quart directur en l'istorgia da RTR. A l'entschatta da ses uffizi ha el envidà ses antecessurs en la chasa da medias RTR: Clemens Pally (directur RTR 1969 fin 1984), Chasper Stupan (directur RTR 1984 fin 2001) e Bernard Cathomas (directur RTR 2001 fin matg 2009).

Foto dals quatter directurs da RTR (da sanester): Clemens Pally, Chasper Stupan, Bernard Cathomas e Mariano Tschuor.
Legenda: Foto dals quatter directurs da RTR (da sanester): Clemens Pally, Chasper Stupan, Bernard Cathomas e Mariano Tschuor. RTR

RTR ha tschertgà LA CHANZUN RUMANTSCHA
L'october ha RTR preschentà ina nova seria d'emissiuns cun il titel «La chanzun rumantscha». Il project interactiv è vegnì lantschà en il Radio Rumantsch, accumpagnà sin www.rtr.ch (guarda link giusut) e cumplettà cun il final en la televisiun. En set emissiuns da radio en successiun ha il public elegì da passa 90 chanzuns rumantschas las 10 ch'èn vegnidas en dumonda sco «La chanzun rumantscha». Il grond final è vegnì emess ils 5 da december a partir da las 20.40 sin il chanal da televisiun RSI LA 1, directamain da Lugano.

Placat RTR tschertga «La chanzun rumantscha».
Legenda: Placat «La chanzun rumantscha». RTR

Nov decor per las emissiuns da la TvR
La Televisiun Rumantscha ha ses emprim agen decor en sia istorgia. Dapi il cumenzament da november 2009 sa preschenta la Televisiun Rumantscha TvR cun ina nova decoraziun e novs signets. La parita nova è vegnida creada en stretga collavuraziun cun la partiziun da concepziun da la televisiun svizra SF.

Tar la decoraziun dal studio da la Televisiun Rumantscha l’onn 2009 domineschan materials grischuns; crap e lain.
Legenda: Il decor dal studio da la Televisiun Rumantscha l'onn 2009. RTR

2006

video
La chasa RTR è inaugurada
Or da RTR dals 30.01.2015.
abspielen. Laufzeit 24 minutas 43 Sekunden.

Dapi ils 15 da matg 2006 emettan Radio e Televisiun Rumantscha ord la nova chasa RTR a la Plazza dal teater a Cuira. En quest center da medias modern sa chattan era ils biros dals correspundents da la Televisiun svizra SF e da Radio DRS, da la Radiotelevisione svizzera di lingua italiana RTSI, ultra da quai era la filiala da l'Agentura svizra da novitads SDA ed il post central da l'Agentura da Novitads Rumantscha ANR. Ils 6 da zercladur è la chasa vegnida averta uffizialmain ed ils 9 e 10 da zercladur èn stads ils dis da las portas avertas. La nova chasa RTR è la quarta dimora da Radio e Televisiun Rumantscha a Cuira.

La chasa da medias RTR a Cuira da dador.
Legenda: Chasa da medias RTR a Cuira. RTR

Artitgels legids il pli savens

Scrollar a sanestra Scrollar a dretga