2011 - 2012

Taidlas bler, vesas cler.

2011

  • 5000 giadas «Impuls»
    La 5’000 avla contribuziun da radio «Impuls» vegn emessa il schaner. Dapi 1994 emetta il RR en ses programs da la damaun ils «Impuls». En quels 17 onns han var 100 auturas ed auters da differentas vegliadetgnas, professiuns e regiuns producì e prelegì 5’000 texts.
  • Roger de Weck visita Cuira
    Il comité directiv da la SSR cun il nov directur general Roger de Weck salva per l’emprima giada sia seduta mensila il favrer en la chasa RTR a Cuira. Il comité directiv è l’organ operativ suprem da la SSR
  • Nov logo
    RTR ha in nov logo ed ina nova denominaziun: RTR Radiotelevisiun Svizra Rumantscha. Il nov logo vegn introducì il matg. Medemamain vala il nov Mussavia da RTR cun las trais valurs centralas: dialoghisar – dar e pretender confidenza – dapli curaschi.
  • Festa federala da musica populara a Cuira
    La Festa federala da la musica populara il settember a Cuira è in eveniment impurtant era per RTR. Passa 70’000 visitaders frequentan la festa. RTR registrescha las producziuns da musica e realisescha numerusas emissiuns da radio. Las registraziuns vegnan fatgas cun il nov bus da producziun. Il nov bus remplazza il studio mobil ch’è stà en funcziun dapi 1992. RTR realisescha era emissiuns da televisiun e collavurescha cun in’emissiun da gala sin SF1.
  • RTR dat canorta a la politica
    Ils 23 d’october dat RTR canorta a la politica ed a tut las medias dal chantun Grischun a chaschun da las elecziuns en il parlament federal.

2012

  • RTR giauda simpatia e sustegn a Berna
    Da temp en temp s’inscuntran il timun da RTR e da la SRG SSR cun la delegaziun grischuna en las chombras federalas a Berna. Ils 18 da settember 2012 è quai stà danovamain il cas. En il center da la discussiun stattan tant la politica da medias da la SRG SSR sco era l’andament da RTR e sias pussaivladads da sa sviluppar. A quest inscunter prendan per regla era part la cussegliera federala e la chanceliera federala grischuna.
  • Taidlas bler – vesas cler
    Nov program dal Radio Rumantsch. La nova structura da program suonda a la maxima: narrativ – flexibel – actual. Ils 30 da schaner va el on air. I sa tracta da la pli gronda midada dal program dals davos 20 onns. Medemamain vegn la nova campagna lantschada: Taidlas bler – vesas cler.
  • Musica rumantscha
    «Chant au tour» sa cloma ina turnea iniziada ed organisada da RTR. Chantauturas e chantauturs rumantschs dattan concerts en 5 differents lieus: L’emprim ils 23 da mars a Cuira, ils auters èn a: Zuoz, Glion, Turitg e Tusaun. A la fin cumpara in disc cumpact.
  • Televisiun Rumantscha
    Novaziuns en il program da la Televisiun Rumantscha: «Cuntrasts discurs» cun Rico Valär, «Controvers» cun Claudio Spescha producì en il studio da la chasa federala a Berna e «Cuntrasts magazin» cun Claudio De Pedrini.
  • SRG.R ha in nov president
    Oscar Knapp vegn elegì president da la societad purtadra SRG.R da la radunanza generala ils 2 da zercladur a Scuol. El surprenda l’uffizi ils 01-01-2013 da Duri Bezzola, president da 2006-2012.
    Ils anteriurs presidents:
    Robert Ganzoni, Schlarigna (1946 – 1951)
    Tista Murk, Müstair (1951 – 1959)
    Christian Badraun, Samedan (1959 – 1968)
    Stefan Sonder, Salouf (1968 – 1984)
    Fidel Caviezel, Sumvitg (1985 – 1996)
    Luregn Mathias Cavelty, Schluein (1997 – 2005)
  • Scolaziun e furmaziun
    RTR dat gronda paisa a la scolaziun ed al perfecziunament professiunal da sias collavuraturas e ses collavuraturs. A partir dal november ha RTR da nov in post per scolaziun e furmaziun che vegn tgirà dad Uorschla Campell e Prisca Bigliel.