2013 - 2014

Ladina Heimgartner nova directura RTR.

2013

  • RTR a Savognin
    Dapi l’entschatta da l’onn è il biro da redacziun dad RTR a Savognin puspè occupà. Il nov correspundent ha num Federico Belotti.
  • 50 onns Televisiun RumantschaIls
    17 da favrer 1963 è vegnida transmessa l’emprima emissiun da televisiun en lingua rumantscha; il «Balcun tort». Per festivar l’anniversari da «50 onns Televisiun Rumantscha» vegnan realisadas en il radio, en la televisiun ed en l’internet 50 istorgias.
  • 75 onns linguatg naziunal
    Ils 20 da favrer emetta il Radio Rumantsch direct da Berna. Cun quella acziun sa regorda RTR dal rumantsch ch’è dapi 75 onns linguatg naziunal.
  • Refurmar, profilar, cooperar
    La dieta da la direcziun RTR ha lieu a Lavin. Elavurada vegn la strategia da l’interpresa per ils onns 2014-2018. Il motto strategic stat sut il titel «refurmar, profilar, cooperar».
  • Applicaziun mobila
    Dapi l’entschatta mars distribuescha RTR ses cuntegns era sur ina nova applicaziun (app) da telefonin. L’app è vegnida sviluppada da RTR en collavuraziun cun SwissTXT, ina firma affiliada a la SRG SSR. L’app è gratuita e disponibla per iPhone e telefonins cun sistem operativ Android.
  • Grüezi Unterland – Allegra Rumantschs
    Dals 10 fin ils 14 da zercladur vegn era discurrì tudestg en il Radio Rumantsch. Cun in transporter fa RTR viadi da Cuira a Turitg ed il medem mument visita SRF3 il Grischun rumantsch. Il titel da l’acziun: «Grüezi Unterland – Allegra Rumantschs».
  • Nov film d’interpresa
    RTR preschenta in nov film d’interpresa. Quel mussa collavuraturas e collavuraturs sin lur viadi a la lavur. Il film è da vesair sin nossa pagina d’internet.
  • Festa d’anniversari «50 onns Televisiun Rumantscha»
    Ils 24 d’avust ha lieu a Cuira la gronda festa d’anniversari «50 onns Televisiun Rumantscha». 300 persunas da lunsch a manaivel han dà suatientscha a l’invit.
  • Ils Svizzers
    Cun il mais tematic «Die Schweizer – Les Suisses – Gli Svizzeri – Ils Svizzers» ha la SSR vulì intimar il public durant il november 2013 da s’occupar da l’atgna istorgia. RTR Radiotelevisiun Svizra Rumantscha ha mess ses accent sut il titel «Nus – quai èn ils auters». Sch’i va per patria ed identitad, gidan savens clischés. Ins sa tgi ch’ins è, ins sa, tgi ch’ils auters èn ed ins na sto betg patratgar. RTR ha raquintà las istorgias latiers.
  • Nov schef da la partiziun Gestiun commerziala
    Il november vegn Beat Lozza, che lavura dapi 1998 tar RTR, elegì nov schef da la partiziun Gestiun commerziala dad RTR. El daventa successur da Maurus Dosch che surpiglia la primavaira 2014 ina nova incumbensa en la direcziun generala da la SRG SSR a Berna.

2014

  • Mariano Tschuor banduna RTR
    Il Cussegl d’administraziun da la SRG SSR ha elegì ils27 da favrer Mariano Tschuor, directur RTR Radiotelevisiun Svizra Rumantscha, sco manader d’ina nova partiziun da stab cun cumpetenzas schlargiadas. El surpiglia la nova incumbensa a Berna l’october 2014. Mariano Tschuor lavura dapi il 1982 per la SRG SSR.
  • Inscunter a Berna cun la deputaziun grischuna
    Ils 18 da mars han RTR e SRG.R envidà la deputaziun grischuna en las chombras federalas a Berna ad ina sentupada. L’inscunter informal ha pussibilità ina discussiun sur da la situaziun dals meds da massa en general, particularmain dals rumantschs, lur avegnir en connex cun il svilup digital e la stenta per ina collavuraziun pli effizienta tranter ils divers acturs dals meds da massa rumantschs.
  • Il Belgischer Rundfunk sin visita tar RTR
    Ils 31 da mars ha gì lieu en chasa RTR ina discussiun al podium «Medias e lur rolla per l’identitad d’ina cuminanza linguistica». Participà al podium ha era Toni Wimmer, il directur dal BRF, che ha visità RTR en cumpagnia d'ina delegaziun da l'interpresa da medias da la Belgia.
  • RTR preschenta l'emprim videobook rumantsch
    A partir dals 31 da mars è il videobook, realisà en connex cun il mais tematic «Ils Svizzers», era disponibel per rumantsch. Il videobook «Ils Svizzers» ch’è vegnì realisà en tuttas quatter linguas naziunalas pon ins telechargiar dal App Store sin il tablet.
  • Ladina Heimgartner nova directura da RTR
    Sin proposta da la suprastanza regiunala da la SRG.R ha il cussegl d'administraziun da la SRG SSR elegì ils 2 d'avrigl Ladina Heimgartner sco nova directura RTR Radiotelevisiun Svizra Rumantscha. Ladina Heimgartner surpiglia il post da Mariano Tschuor il 1. d'avust 2014.
  • RTR sa prepara per l'avegnir digital
    En la seduta dals 2 d'avrigl ha il cussegl d'administraziun da la SRG SSR sancziunà il project «Multimedia 2019» (MM19) da RTR. Il project strategic che vegn realisà en il decurs dals proxims onns ha sco finamira principala l'adattaziun da l'offerta da program als basegns futurs dal public.
  • RTR visita ORF
    Ils 15 d'avrigl ha la direcziun da RTR fatg viadi sur cunfin e visità il Landesstudio Vorarlberg dal ORF. Il directur Markus Klement ha manà la delegaziun da RTR tras la chasa a Dornbirn ed infurmà davart las incumbensas e sfidas dal studio regiunal cun ina offerta sumeglianta ad RTR.
  • La nova direcziun da RTR è pronta
    Ladina Heimgartner (34) è l’emprima dunna a la testa da RTR Radiotelevisiun Svizra Rumantscha. A partir da l’avust 2014 furma ella ensemen cun Gian Ramming (schefredactur), Pius Paulin (schef tecnica) e Beat Lozza (schef gestiun commerziala) la nova direcziun che vegn sustegnida dal referent da la direcziun, Erwin Ardüser.