Siglir tar il cuntegn

Header

cuntegn

Istorgia 2018 - 2019

La cronica da RTR 2018 - 2019

2018

Schaner

01-01, Cuira
Dapi il schaner èsi pussaivel da leger novitads regiunalas da RTR en il Grischun sin ils visurs da l'AutoDaPosta.

31-01, Cuira
Turnea da la lectura «Sin il viv!»: Per festivar il giubileum da 25 onns da l'emissiun «Impuls» dal RR che RTR emetta dapi 1993 ha la redactura responsabla Flurina Badel organisà ina turnea da lectura. L'emprima da las set lecturas planisadas ha gì lieu la fin da schaner en la Garascha Oberalp a Sedrun.

Mars

04-03, Cuira
Ils 4 da mars vegn l'iniziativa «No Billag» - che vuleva abolir las taxas per radio e televisiun refusada. En l'entira Svizra èn 71.6% ed en il Grischun 77.2% da las votantas e dals votants cunter l'iniziativa.


Fanadur

01-07, Cuira
Onlinepanel: La stad 2018 ha RTR envidà bun 3'000 persunas da participar ad ina retschertga online. Passa 800 persunas han acceptà da participar a questa - per RTR - nova furma da retschertga e da far 4-5 l'onn retschertgas tar ils temas radio, tv ed online.


Settember

23-09, Cuira
La saira dals 23 da settember mussa SRF1 la cumedia «Amur senza fin» - in film da televisiun per rumantsch. Las emprimas discussiuns per realisar in film rumantsch han gì lieu gia il 2012. Dus motivs èn stads decisivs: las acturas ed ils acturs che discurran rumantsch e l'impurtanza politic-culturala d'in tal project.

2019

Favrer

01-02, Cuira
Peer Review: Represchentantas e represchentants da chasas da medias publicas han discutà il favrer en Chasa RTR a Cuira davart lur «raison d'être».

26-02, Cuira
Dapi ils 26 da favrer sa preschenta la pagina d'internet rtr.ch en in nov layout.


Mars

25-03, Cuira
Ils 25 da mars è vegnì preschentà a la publicitad il concept «Medias rumantschas 2019». Per garantir ina purschida mediala durabla era en rumantsch vegn intesivada la collavuraziun tranter las medias privatas e las medias publicas/RTR.


Avrigl

09-04, Cuira
En la seduta dals 9 d'avrigl ha la direcziun RTR lantschà il project «metadatas ed intelligenza artifiziala». L'emprim focus per RTR sa fatschenta cun il project «speech to text/pled tar text» (maschinas ch'emprendan cun agid dad audios e transcripziuns ils idioms rumantschs). Finamira è da cuntanscher ina transcripziun automatica da texts che po alura p.ex. vegnir duvrada per megliurar la tschertga en l'archiv, crear texts transcrits automaticamain per elavurar contribuziuns ubain en connex cun la preparaziun da sistems d'uschenumnads «Smart Speakers».


November

01-11, Cuira
L'entschatta da november ha Ladina Heimgartner, daipi ils 2014 directura da RTR, annunzià ch'ella badnunia la fin da l'onn la SRG SSR, per la quala ella è stada engaschada en differentas funcziuns ils ultims 13 onns. En la chasa da medias Ringier vegn ella en il futur a far part dal comité da direcziun e manar il «Corporate Center».

09-11, Falera
Ils 9 da november ha RTR festivà «35 onns producziun da musica». En il rom d'ina saira da cumpagnia en la Fermata a Falera èn vegnidas a pled persunas da la scena da musica, e durant in'entira emna ha RTR emess puncts culminants da concerts registrads dapi il 1984.


December

12-12, Cuira
Il december cumpara l'ultima ediziun dals Accents, la gasetta da chasa da RTR, che vegnan edids dapi il 2010 mintgamai quatter giadas l'onn.

RTR