2022
Schaner
04 – 07-01, differentas regiuns
RTR ha visità l'emprima emna da l'onn ses public. Dals 4 fin ils 7 da schaner essan nus sa fermads en differents lieus sco Mustér, Breil, Scuol, Samedan, Savognin, Trin, Vella e Panaduz. Cun in pitschen regalin ha RTR giavischà in bun onn nov a pitschen e grond.
2021
Schaner
01-01, Cuira
Il nov directur RTR cumenza. Cun l’entschatta da schaner ha Nicolas Pernet da Sent surpiglià uffizialmain la responsabladad sco nov directur da RTR.
Favrer
23-02, Cuira
Radund trais mais suenter la lantschada da la nova plattafurma da streaming Play Suisse èn disponiblas sin quella radund 120 contribuziuns per rumantsch ubain cun suttitels rumantschs.
Avrigl
23-04, Cuira
L'entschatta da favrer 2021 ha RTR lantschà l’acziun interna «50:50» che sa basa sin in project da la chasa da medias publica BBC da la Gronda Britannia. La finamira è d’augmentar la cumpart da dunnas en ils formats da radio, televisiun ed online. Uschia vegn nudà regularmain quantas dunnas e quants umens ch’èn vegnids a pled en las emissiuns e contribuziuns. Durant il mars 2021 mussa la statistica p.ex. la suandanta situaziun sur l’entir program RTR: 57% umens e 43% dunnas èn vegnidas a pled. La finamira è da cuntanscher a media vista in resultat equilibrà e persistent da 50% umens e 50% dunnas.
Matg
26-05, Cuira
Dapi la fin da matg emettan las moderaturas ed ils moderaturs RTR or dal nov studio da radio. La chasa da medias rumantscha ha modernisà ses studio da radio ed equipà quel cun nova tecnica. Il medem mument ha RTR er adattà l'organisaziun da las redacziuns per render fittas ellas per il mund digital.
Zercladur
30-06, Cuira
Cun la fin da zercladur è Giusep Giuanin Decurtins ì en pensiun. Durant ils ultims passa 38 onns ha el lavurà en chasa RTR, ed ha en spezial stabilì, sviluppà e tgirà tut quai che ha da far cun la producziun da musica da RTR.
Fanadur
13-07, Cuira
RTR porscha era quest onn puspè ils pass da vacanzas als uffants da las differentas regiuns e construescha ensemen cun ils uffants radios DAB+.
Avust
26-08, Cuira
RTR è il radio il pli simpatic da la Svizra. Quai demussa ina retschertga da la Publicom SA tar 52 staziuns da radio en l'entir pajais. La retschertga represchentativa è vegnida fatga durant ils mais d'avrigl e matg 2021 tar 4’700 persunas tranter 15 e 79 onns.
27-08, Mustér
Ils 12 d’october 1946 è stada la radunanza da fundaziun da la Pro Radio Rumantsch. Quai è stà il crap da fundament per l’uniun purtadra da RTR che sa numna oz SRG SSR Svizra Rumantscha u curt SRG.R. Il 2021 ha la SRG.R pia 75 onns ed envida a festas popularas a Mustér (27-08) ed a Schlarigna (08-10).
Settember
13-09, Cuira
Tgi èsi stà? RTR lantscha il nov format d’in crimi-dinner televisiv cun il titel «Mortori a…»
Per l’emprima episoda è RTR sa decidì da far las registraziuns en il restaurant Parlatsch a Trin Mulin. Uschia èsi pia capità in «Mortori a Trin Mulin». Per l’emprima seria deriva la mesadad dals acturs laics da la Surselva e l’autra mesadad da l’Engiadina.
December
03-12, Cuira
Il patrimoni audiovisual da la Svizra rumantscha duai vegnir digitalisà, segirà e rendì accessibel a la publicitad a lunga vista. Cun questas finamiras han la direcziun generala ed il cussegl d’administraziun da la SRG SSR decidì da constituir la «Fundaziun Patrimoni Cultural RTR». La fundaziun cumenza sia lavur il 1. da schaner 2022 e vegn presidiada da Nicolas Pernet, directur RTR.
01 fin 24-12, Cuira
RTR emetta il prim chalender d'advent audiovisual per uffants. Mintga di pon ils uffants avrir ina porta virtuala, emprender novas chanzuns e chantar cun.
31-12, Cuira
Era durant il 2021 ha la pandemia da Corona occupà fermamain RTR. Uschia han p. ex. numerusas activitads betg pudì vegnir organisadas, ed era las visitadas e guidas en chasa RTR a Cuira n'èn betg stadas pussaivlas.
