Cun il focus sin curriders populars porta RTR era quest onn il pli grond event da sport dal Grischun tar il public a chasa. Plinavant accumpogna il reporter da sport Andreas Wieland a Serafin Beer da Mustér durant il Maraton da skis engiadinais. Da las preparaziuns, sur il culp da partenza enfin als resultats. Tge capita sin e dasper la loipa durant la cursa e nua è Andreas Wieland gist il mument? Tut quai ed anc dapli datti d’udir live tranter las 6:00 e las 12:30 al Radio Rumantsch. La saira a las 17:25 dattan ils Cuntrasts sin SRF1 ina resumaziun dal di da la cursa da giubileum – cun victurs e veterans, cun svilups istorics e trends actuals dal sport da passlung. La purschida vegn cumplettada cuntinuadamain sin rtr.ch cun films, fotografias ed istorgias da quai che capita avant e durant il 50avel Maraton da skis engiadinais.
Medias 2018 Radio maraton live da l’Engiadin’Ota
Ils 11 da mars 2018 emetta RTR da las 6:00 fin a las 12:30 directamain dal 50avel Maraton da skis engiadinais. RTR accumpogna la cursa da passlung e porscha impressiuns ed istorgias dal start la damaun a Malögia enfin l’arrivada a S-chanf.