Chant e musica èn materia viva! E gist per Rumantschas e Rumantschs muntan chant e musica identitad. Identitad che creescha cuminanza. Promover, tgirar e collectar questa materia è ina da las incumbensas da RTR. Las emprimas registraziuns da chors ch’èn da chattar en l’archiv da RTR dateschan da l’onn 1938, l’onn da la votaziun dal rumantsch sco lingua naziunala.
Il 1984, pia avant 35 onns, ha RTR fatg sia emprima atgna producziun da musica. Natiralmain èn era vegnidas fatgas avant il 1984 differentas registraziuns rumantschas da chant e musica, da singuls concerts u era registraziuns da repertori – ma da lez temp anc dal radio DRS. Dapi lura è sa midà bler e l’archiv da registraziuns e creschids sin passa 11'000 tocs.
Durant la saira da cumpagnia a Falera vegn guardà enavos sin ils ultims 35 onns - natiralmain era cun dar in sguard en l’archiv. Nus mussain il redactur da musica Giusep Giuanin Decurtins e ses team en acziun durant ina registraziun. Chantaduras, dirigents e musicists raquintan anecdotas: “In radio cun musica indigena fatga da nossa glieud, quai è insatge dal pli bel ch’i dat.” Mario Pacchioli sa regorda anc da sia emprima registraziun cun RTR il 1995. “Jau n’aveva anc mai chantà avant in microfon. Igl è stà l’emprim pass en mia carriera.”
Tgi che na po betg ir a Falera ils 09-11-2019 ha la pussaivladad da suandar l’act festiv a partir da las 20:15 via livestream sin rtr.ch.