Dad autopurtrets sur maletgs abstracts enfin a maletgs cun motivs or da la natira – quest onn sa mussa la fatschada da la chasa da medias RTR durant il temp d’advent colurada e plain fantasia. Quai grazia a 24 maletgs da las scolaras e dals scolars da la scola d’art da Cuira ch’ellas ed els han creà durant lur studi. Mintga maletg è in unicat e signifitgescha adina insatge auter.
Uschia per exempel embellescha la creaziun «Ils Cavistrai» da Valeria Cathomen ina fanestra tar RTR. Ses maletg è ina part d’ina seria da cartas postalas, las qualas ella ha stampà sin linol: «Mia idea era, da prender ils culms da Breil «Ils Cavistrai» sco motiv e mintgamai midar giu la colur dal tschiel tar mintga carta. Quai hai jau empruvà da far uschia simpel sco pussaivel – dentant cun mantegnair l’effect dals culms imposants.»
Era Barbara Truog contribuescha cun ses maletg «Autopurtret en la bognera» al chalender d’art tar RTR. Quai cun in autopurtret che mussa ella durant il lockdown da questa primavaira. Ella è vegnida tschiffada d’ina unda da suldina entras il svelt midament d’allegria e travasch en il vitg. Nagins turists pli e vias vitas. Tuttenina d’era ella suletta. «Far il bogn gida tar suldina – pens jau en mintga cas. Quai gida a relaxar, reflectar u meglier ditg ad ‘esser empatic’. Qua nascha mintgatant detg bler. Per fortuna san ins en la bognera a la fin mo trair il cucun e tut il nausch curra giu.»
Quests dus maletgs sco era anc 22 auters datti da vesair a partir dal 1. da december sin las fanestras da la chasa da medias RTR a Cuira. Mintga saira a partir da las 18:00 vegn mintgamai in maletg scuvrids ed illuminads. L’istorgia ubain l’idea davos mintga creaziun da las scolars ed ils scolars è accessibla sin rtr.ch.