Da mattetta tgirava Petra Battaglia sias poppas, Anita Pedretti era gia en scolina en il chantun da l’ospital e Fabiana Sac gidava gia adina gugent als umans. Tuttas trais tutgan tar quellas persunas, senza las qualas ch’i na va betg – senza las persunas, che lavuran en la tgira. Corona ha accentuà lur valur. Tuttina regna anc savens l’idea che lavurar en la tgira saja metter si plasters, lavar pazientas e pazients ed als dar medicaments. Il mintgadi, ch’ellas trais han laschà observar ad Isabelle Jaeger, redactura da RTR, per ils «Cuntrasts», mussa bain spert, ch’il mastergn da la tgirunza pretenda betg be engaschi, ma ina passiun per la tgira. La documentaziun datti da guardar dumengia, ils 14-03-2021 a las 17:25 sin SRF1 ubain da tuttas uras sin rtr.ch.
Livestream: Controvers spezial davart la tgira en pitgiras
In onn corona vul era dir in onn da tgira al limit. Co è quest onn spezial sta per las chasas da tgira ed attempads ni en ils ospitals? Suenter ils «Cuntrasts» discuta il moderatur da RTR, Andri Franziscus, en il studio cun expertas ed experts davart la tematica. En ina emprima runda èn ils ospitals pitschens e las chasas da tgira ed attempads en il center, en ina segunda runda las dumondas politicas en connex cun la tgira.
Ils giasts da l’emissiun:
- Claudia Tomaschett, manadra da la chasa da tgira ed attempads Glion
- Urs Cadruvi, directur da l’ospital Schiers da la fundaziun Flury
- Renate Rutishauser, presidenta da l’Associaziun da las tgirunzas e dals tgirunz secziun Grischun
- Martin Schmid, cusseglier dals chantuns (PLD) e president dal cussegl d’administraziun da l’ospital chantunal dal Grischun