Siglir tar il cuntegn

Header

cuntegn

Medias 2016 Di dal Pled rumantsch 2016 tar RTR

Ensemen cun il public tschertga Radiotelevisiun Svizra Rumantscha (RTR) ils 13 da december 2016 il pled rumantsch da l’onn. Il medem di cumpona Flavio Bundi ensemen cun scolarAs da la scola chantunala da Cuira ina chanzun sin basa dals pleds che vegnan proponids.

Sper la tschertga dal Pled rumantsch 2016 vegn creà cun las propostas dals pleds ina chanzun per chors. Ina classa rumantscha da la Scola chantunala a Cuira cun scolaras da tut ils tschintg idioms scriva il text da la chanzun. Mintga idiom survegn ina strofa en la chanzun. Per la part musicala è responsabel il giuven cumponist Flavio Bundi. El cumpona cun las rimas dals scolars e las scolaras la melodia per la chanzun dals pleds.

Il svilup da la chanzun pon ins persequitar l’entir di tar RTR, online sin rtr.ch, sin ils chanals da social media ubain al Radio Rumantsch. La chanzun cumpletta vegn preschentada la saira en l’ura da musica «Noss chors».

In chor ad hoc

La prova ha lieu en il studio da televisiun da RTR. Questa prova vegn emessa live en l’emissiun «Noss chors» dal Radio Rumantsch a partir da las 19:00. Flavio Bundi, il cumponist da la chanzun, maina questa prova da chant. La primaudiziun da la chanzun è alura d’udir curt avant las 20:00 live al radio.

L’entira prova dal chor vegn era filmada ed emessa sin www.rtr.ch.

AuditurA po participar a la giuria

Ina auditura u in aspectatur da RTR ha la pussaivladad da far part da la giuria dal Pled rumantsch 2016. Persunas interessadas pon s’annunziar enfin ils 9 da december per mail u per posta directamain tar RTR.

Sper l’auditurA èn represchentads en la giuria: Anna Alice Dazzi, linguista RTR, Augustin Beeli, schurnalist da l’Agentura da novitads rumantscha, Gian Michael, deputà da Donat e Dominique Dosch, autura surmirana.

Il suentermezdi dals 13.12.2016 tscherna la giuria il Pled rumantsch da l’onn 2016 da tut ils pleds ch’èn vegnids annunziads dal public enfin mezdi.

Pled rumantsch 2016

Avrir la box Serrar la box

Radio Rumantsch mardi, ils 13.12.2016 durant l’entir di

Telesguard mesemna, ils 13.12.2016 a las 17.40 sin SRF1

Online www.rtr.ch/pledrumantsch2016

Propostas enfin ils 13 da december

Propostas pon vegnir inoltradas enfin ils 13 da december 2016 a las 12.30

  • cun il formular sin la pagina d’internet www.rtr.ch/pledrumantsch2016
  • per telefon cun il nr. 081 255 79 00
  • via mail a pledrumantsch@rtr.ch
  • sin la pagina www.facebook.com/rtr.ch u
  • via twitter cun inditgar #rtrpled16 ubain per posta.

Il di da l’acziun po il pled era vegnir annunzià via telefon: 081 255 79 00

Artitgels legids il pli savens