Premiera da film e discussiun da podi: Medis da chasa

RTR envida a la premiera dal film «Medis da chasa». Il film documentar accumpogna dus medis da chasa rumantschs durant lur mintgadi. Edith Oechslin-Decurtins e Gian Bundi. La premiera cun discussiun da podi ha lieu mesemna, ils 19 d’october 2016, a las 19:30 en il kino Apollo a Cuira.

Edith Oechslin-Decurtins, media a Cuira en ina pratica communabla Bild in Lightbox öffnen.

Legenda da maletgs: Edith Oechslin-Decurtins, media a Cuira en ina pratica communabla. RTR

Grazia a la fidanza tar la cineasta ch’è stada sezza 20 onns media da chasa, raschunan Edith Oechslin-Decurtins, ina media en ina gronda pratica communabla en la citad da Cuira, e Gian Bundi, in medi en ina pratica singula en Val Lumnezia, a moda fitg persunala co ch’els patratgan, sentan ed ageschan.

Els discurran dal plaschair vi da lur professiun e da lur quitads per l’avegnir da questa professiun, en spezial per il chantun Grischun. Quai en in temp nua che tut sa mida era puncto politica da sanadad. Malgrà che la professiun dal medi da chasa è actualmain en l’entira Svizra en ina crisa, crain els en la medischina dal medi da chasa ed èn plain entusiassem.

Gist suenter la premiera datti ina discussiun da podi tar il tema Medis da chasa: Model da liquidaziun u model per l’avegnir? A la discussiun prendan part: Edith Oechslin-Decurtins, presidenta da l’uniun da medis da chasa Grischun, Rudolph Leuthold, manader da l’uffizi da sanadad ed André Müller, manader medicinic Grisomed.