En il center da la roadshow stattan il barat ed il dialog cun il public. Visitadras e visitaders pon participar activamain al program, dar in resun, prender part a la concurrenza ed emprender d’enconuscher las collavuraturas ed ils collavuraturs. A partir dal mars 2016 gira la «Microlotta» tras il Grischun e sa ferma tranter auter era en lieus forsa betg exnum tipic rumantschs, ch’èn dentant daventads in dachasa per bleras Rumantschas e blers Rumantschs.
Il cumenzament dal gir fa RTR ils 18 – 20 da mars a San Murezzan.
Ina purschida multifara
La punt dal bus è equipada cun infrastructura d’audio, video e multimedia. Sin in dals visurs pon ins observar la moderatura en il studio dal Radio Rumantsch, dar ina baterlada ubain plazzar in giavisch musical. Lura stattan era a disposiziun differents visurs per fufragnar en las emissiuns da Battaporta, Minisguard, Cuntrasts e Telesguard. Plinavant pon ils visitaders navigar en l’app Play RTR ubain trametter fotografias, impressiuns e commentaris via Facebook e Twitter direct al lieu.
Tamara Deflorin,
Microlotta - in num tut spezial per il bus
Il public da RTR ha gì la pussaivladad da sa participar a la concurrenza per in num dal bus. Via rtr.ch, telefon, Facebook e Twitter èn vegnidas inoltradas entaifer trais dis 110 propostas creativas. Al microfon è vegni tratg la sort. Gudagnà ha Gion Cahenzli da Turitg cun il num «Microlotta».