Curt, frestg e sin il punct: L’emissiun «sil punct» tegna sin il current il public era durant la stad. Ladina Heimgartner, directura RTR: «Sco chasa da medias publica stattan ils basegns dal public en il center. Jau m’allegra d’ademplir cun l’emissiun «sil punct» il giavisch da bleras aspectaturas ed aspectaturs dad era purtar la stad en la televisiun las istorgias ord la Svizra Rumantscha.»
Tras l’emissiun «sil punct» mainan alternant Annina Campell, Livio Foffa, Victoria Haas ed Isabella Wieland. En strusch tschintg minutas infurmescha l’emissiun a moda divertenta e cumpacta da tut l’impurtant en Svizra Rumantscha ed il Grischun.
«sil punct» vegn emess dals 4 da fanadur fin ils 19 d’avust 2016 da glindesdi fin venderdi a las 17:50 sin SRF1. Schebain i stat tar in emprova unica u schebain l’emissiun «sil punct» daventa in punct fix en il program da stad, quai sa decida la direcziun da RTR suenter la stad.
«sil punct» datti adina e dapertut era sin rtr.ch, las plattafurmas socialas ed en l’app
Play RTR: a la splagia, en curtin u sin l’acla.