Cuntrasts preschenta: Angelika anghel

Radiotelevisiun Svizra Rumantscha mussa dumengia, ils 22.01.2017 a las 17:25 il film 'Kauffmann anghel' sin SRF 1. Il film dal reschissur ollandais Fred van der Kooij raquinta l’istorgia d’Angelika Kauffmann (1741-1807) ch’è naschida a Cuira.

Angelika Kauffmann. Bild in Lightbox öffnen.

Legenda da maletgs: Angelika Kauffmann. RTR

Il reschissur ollandais da films Fred van der Kooij ha realisà per la Televisiun Rumantscha in film sur da la pictura Angelika Kauffmann, naschida 1741 a Cuira. Ses film è in monument festiv per l’artista che aveva tant talents per la musica sco er per la pictura. Pervia da ses talent musical ha il reschissur occupà la rolla principala cun la chantadura ed actura Claudia Dieterle.

En il film aud’ins grondiusas arias talianas da lez temp e survegn il medem mument invistas als maletgs e la persunalitad dad Angelika Kauffmann. Las infurmaziuns davart l’artista da renum internaziunal èn pachetadas en legras episodas inscenadas: La rapportadra sauta cun in vestgi da bal tras la citad da Cuira dad oz ed il moderatur metta en moviment ina maschinaria da teater baroc. Il film da Cuntrasts da 25 minutas tschenta era la dumonda ch’era da quella giada in grond tema en saluns e giassas: numnadamain tge relaziuns che la Kauffmann avevan cun ses models masculins.