En il center da l'emissiun stat ina ficziun documentara cun il titel «Ina stad cun chaliras» (tudestg «Gefährlicher Sommer»). Ina famiglia en il chantun Vallais passenta ina stad da chaliras cun bleras fassettas. La mamma è dumandada sco commembra dal cussegl communal, il bab lavura sut cundiziuns difficilas en l'ospital ed ils uffants sentan ils privels da la natira durant in champ da vacanzas.
Ina stad da chaliras e sias consequenzas
Questa ficziun documentara, realisada dal reschissur da Cuira Daniel von Aarburg, vegn emessa en trais parts e porscha uschia la basa per ulteriuras contribuziuns e discussiuns. En il studio a Cuira èn tranter auter envidads sco giasts il climatolog Jan Sedlacek, il glaziolog Felix Keller e la gestiunaria dal WWF Grischun Anita Mazzetta.
Damain enviern, dapli stad
Las consequenzas dal stgaudament dal clima per il turissem èn centralas per la versiun rumantscha da la saira tematica. Annina Campell s'annunzia dal post extern sin il Crap Sogn Gion, ses giast è il visiunari da turissem Reto Gurtner. En il studio sa confrunta il schef da Grischun Vacanzas, Martin Vincenz, cun las dumondas davart il futur dal turissem grischun.
En tut las quatter linguas naziunalas – per rumantsch sin SRFinfo
La saira tematica naziunala vegn emessa en tut las quatter linguas naziunalas. La ficziun documentara e las contribuziuns èn las medemas sin tut ils chanals. Differents èn ils accents, la tscherna dals giasts e la lingua. Planisadas èn era colliaziuns tranter las regiuns linguisticas. La versiun rumantscha pon audituras ed auditurs suandar sin SRFinfo.
Andri Franziscus preschenta l'emissiun da premiera che dura trais uras or dal studio a Cuira. Annina Campell s'annunzia dal post extern a Laax. La presidenta da la regenza Barbara Janom Steiner e la scriptura Romana Ganzoni han quella saira ina carte blanche per critica e dumondas sin las medias socialas. La versiun rumantscha da la saira tematica vegn emessa sin SRFinfo e sin rtr.ch. Online chatt'ins plinavant blers artitgels e numerusas contribuziuns en connex cun il tema.
L'emissiun «+3°» da Radiotelevisiun Svizra Rumantscha pon ins guardar ils 29 da november 2017 a las 20.05 en directa sin SRFinfo. Sin ils chanals da social media pon ins prender part a la discussiun cun il hashtag #RTRclima.