Siglir tar il cuntegn
Inhalt

Medias 2018 Finals dal ballape grischun sco livestream tar RTR

Ils 10 da matg 2018 emetta RTR ils finals da la Cuppa Grischuna da las dunnas e dals umens a partir da las 13:20 live sin rtr.ch. Uschia giogan a las 13:30 las duas meglras equipas da las dunnas, Tusaun Cazas cunter Domat, ed a las 16:00 ils umens da Moesa cunter Cuira 97 II.

RTR emetta ils finals da ballape grischun sco livestram.
Legenda: RTR emetta ils finals da ballape grischun sco livestram. RTR

Guardar ballape grischun cun commentari rumantsch, e quai cumadaivlamain en stiva sin canapé ubain en viadi via telefonin? Grazia al livestream da RTR è quai senz’auter pussaivel. RTR mussa quest spectacul sportiv sco video-livestream sin rtr.ch, facebook.com/rtr.ch ubain via HbbTV sin SRF1/SRF2.

Producì cun in simpel bus da transmissiun, cun intervistas avant, durant e suenter ils gieus e cun commentari rumantsch. Gian Carlo Candinas, redactur da sport da RTR, commentescha ensemen cun la co-commentatura Seraina Friedli - ballapedista en la squadra naziunala da las dunnas- il gieu da las dunnas. La partida dals umens vegn commentada dal redactur da sport da RTR Andreas Wieland e dal co-commentatur Daniel Caduff, anteriur skiunz ed expert dal ballape regiunal.

Tar quests gieus na vai betg sulettamain per puncts, mabain era per l'onur: ils victurs astgan numnadamain sa numnar il numer 1 dal ballape dal Grischun. Uschia giogan ils 10 da matg 2018 a partir da las 13:30 las duas meglras equipas da las dunnas Tusaun Cazas cunter Domat, ed a las 16:00 ils umens da Moesa e Cuira 97 ll.