Siglir tar il cuntegn
Inhalt

Medias 2018 Grond interess per la premiera dal film «Amur senza fin»

Suenter la premiera mundiala a Locarno mussa RTR ensemen cun la SRG SSR il film rumantsch «Amur senza fin» ussa a Sagogn. Da la partida èn era ils protagonists dal film e la crew.

Il film «Amur senza fin» ensemen cun Rebecca Indermaur, Bruno Cathomas, Tonia Maria Zindel e bler auters.
Legenda: Il film «Amur senza fin» ensemen cun Rebecca Indermaur, Bruno Cathomas, Tonia Maria Zindel e bler auters. RTR

Suenter 20 onns lètg è il fieu tranter Mona (Rebecca Indermaur) e Gieri (Bruno Cathomas) mo pli falombra. Mona decida da tschertgar agid tar Nanda Sharma (Murali Perumal), il nov plevon dal vitg cun ragischs indicas. Ma empè da survegnir cussegls pastorals d'in spiritual, encuraschescha il plevon ella da far diever da meds dal tuttafatg profans e da s'approfundar en l'art da l'amur. Ma quai è prest ditg, (ma betg anc fatg). Gieri è numnadamain occupà cun la chatscha da capricorns e na fa betg cas da las premuras da sia dunna. Almain fa el crair quai Mona che na sa betg che Gieri ha in'affera cun sia meglra amia Giulia (Tonia Maria Zindel).

Bleras acturas e blers acturs dal Grischun han actualmain success sur ils cunfins. Ina da las finamiras da la SRG SSR è stada d'unir quellas persunas en il film rumantsch «Amur senza fin». Tge è il resultat? Ina cumedia grischuna cundida cun ina presa India. «Amur senza fin» è l'emprim film da televisiun professiunal rumantsch ed ina cumedia divertaivla che vul render pli famigliara la lingua rumantscha ad in public vast. I sa tracta d'ina istorgia dal mintgadi ch'includa tradiziuns grischunas, sco per exempel la chatscha, e che s'occupa da svilups rurals e socials.

La SRG SSR mussa «Amur senza fin» ils 23 da settember 2018 a las 20:05 sin SRF 1 cun suttitels tudestgs.