Siglir tar il cuntegn
cuntegn

Medias 2018 Impuls litterars «live» da Guarda

Il «Sin il viv!» sa ferma questa giada en l’iert da la Chasa Torel a Guarda. Qua prelegian las auturas Rut Plouda e Fadrina Hofmann ed ils auturs Plinio Meyer ed Arnold Spescha lur texts. Di per di, dapi l’onn 1993, emetta RTR en l’emissiun Impuls, in patratg per cumenzar il di.

Quai era il «Sin il viv!» a Guarda.
Legenda: Quai era il «Sin il viv!» a Guarda. RTR

La scriptura Rut Plouda (*1948) scriva gia dapi l’onn 1998 per l’emissiun Impuls. Famusa è ella surtut per ses raquint «Sco scha nüglia nu füss» e per sias poesias. Rut Plouda raquinta savens da muments efemers en ses mintgadi ed als descriva cun blera finezza ed eloquenza. Il mintgadi sco mamma da dus uffants e dunna giuvna ch’è schurnalista, ma era scriptura, èn ils temas principals dals Impuls actuals da Fadrina Hofmann (*1982). Ses Impuls èn d’udir al Radio Rumantsch dapi l’onn 2006.

Il scriptur sursilvan Arnold Spescha (*1941) è enconuschent per sias poesias ch’èn vegnidas publitgadas en divers cudeschs. Ma Arnold Spescha scriva era prosa: dapi l’onn 2012 è el d’udir en l’emissiun Impuls. Il quart scriptur che prelegia a la lectura da «Sin il viv!» a Guarda è il Jauer Plinio Meyer (*1962). Dapi l’onn passà scriva el per ils Impuls dal Radio Rumantsch essays spiertus d’observaziuns da noss diever da la lieunga e tscharvè.

Suenter Guarda segua la tschintgavla lectura da «Sin il viv!» dumengia, ils 26 d’avust 2018 a las 16:30, sin il bain puril «La Muota» dad Ingrid ed Alexander Casanova a Lumbrein. Là legian Carin Caduff, Asa S. Hendry, Myriam Pelican ed Arnold Rauch lur texts - Impuls che raquintan tranter auter da vatgas emoziunalas ed umans cun cornas. Sco adina è la lectura publica e l’entrada libra.