Siglir tar il cuntegn
Inhalt

Medias 2018 Impuls litterars «live» da Lumbrein

Tschaffen da tadlar? Impuls prelegids là, nua che l’emissiun Impuls da RTR vegn uschiglio tadlada. Quell’occasiun sa porscha dumengia, ils 26 d’avust 2018 a las 16:30, sin il bain puril «La Muota» da la famiglia Casanova a Lumbrein.

 Arnold Rauch, Carin Caduff, Myriam Pelican, Asa S. Hendry e la moderatura Flurina Badel.
Legenda: Arnold Rauch, Carin Caduff, Myriam Pelican, Asa S. Hendry e la moderatura Flurina Badel. RTR

Mintga damaun, cura ch’el mulscha las vatgas taidla Alexander Casanova l’Impuls da RTR. Cura che l’Impuls vegn al radio, sa il pur ch’el ha anc ventg minutas peda avant da stuair manar il latg en la latgaria. Insumma, sco era tar blers auters, fa l’Impuls part da ses mintgadi. Per engraziar al public per ses grond interess a l’emissiun envida RTR en collavuraziun cun la Lia Rumantscha da vegnir a tadlar Impuls prelegids live.

Il pli vegl autur da «Sin il viv!» a Lumbrein è Arnold Rauch ch’è oriund da Ftan. El è cineast e schurnalist e viva a Cuira. Sper la chanzun «Il mariner» ha Arnold Rauch era scrit texts litterars da differents geners ch’èn tranter auter vegnids publitgads en la «Litteratura» da l’Uniun per la Litteratura Rumantscha. La pli giuvna scriptura che prelegia a Lumbrein è Asa S. Hendry da Vella. Ella ha fatg la matura quest onn, fa teater, va ad alp e scriva. Il 2015 è cumparì ses emprim roman da fantasia «Emalio» tar la Chasa Editura Rumantscha ch’ella ha scrit ensemen cun Flurina Albin. Dapi lura scriva Asa S. Hendry suletta - quai cun grond success.

Er Lumneziana è l’autura Carin Caduff che lavura sco pedagoga sociala en il chantun Argovia. Carin Caduff scriva lirica e prosa. Ses texts èn vegnids publitgads tranter auter en la «Litteratura 35» cumparida il 2016 tar l’Uniun per la Litteratura Rumantscha. La quarta autura è Myriam Pelican-Camenisch che scriva Impuls dapi l’onn 2011. Ella ha frequentà il seminari scolastic a Cuira e suenter lavurà sco redactura tar il Radio Rumantsch. Uss è ella scolasta, pura e mamma e cura ch’i va, scriva ella per exempel prosa curta spiertusa en il pli bel dialect da Domat per l’emissiun Impuls.

La sisavla lectura da «Sin il viv!» suonda dumengia, ils 7 d’october 2018, a las 16:00 en la stiva da la Chesa Gianzun a Schlarigna. Là legian Dumenic Andry, Sara Francesca Hermann, Bettina Secchi e Martin Cantieni Impuls che raquintan da princessas da pantoflas ed eroxs dal jet-set. La turnea è publica, l’entrada libra.