Siglir tar il cuntegn
Inhalt

Medias 2018 Impuls litterars «live» da Schlarigna

Seser patgific en ina bella stiva engiadinaisa e tadlar istorgias rumantschas - quai porscha la sisavla lectura da la turnea litterara «Sin il viv!». La turnea sa ferma là, nua che l’emissiun Impuls da RTR vegn uschiglio tadlada al radio. Questa giada en la stiva da la Chesa Gianzun a Schlarigna.

Dumenic Andry, Sara Francesca Hermann, Bettina Secchi, Martin Cantieni e la moderatura Flurina Badel en stiva a Schlarigna.
Legenda: Dumenic Andry, Sara Francesca Hermann, Bettina Secchi, Martin Cantieni e la moderatura Flurina Badel en stiva a Schlarigna. RTR

D’aventuras da princessas da pantoflas, d’umans sco giats, d’eroxs dal jet-set u lura dals varsaquants poets ch’èn inspirads dals lais en Engiadin’Ota. Da quai raquintan ils novischems e vegls Impuls che Dumenic Andry, Sara Francesca Hermann, Bettina Secchi e Martin Cantieni vegnan a preleger «live» en la stiva da la famiglia da la scriptura Romana Ganzoni en la Chesa Gianzun a Schlarigna.

Questa prelecziun en in rom intim è er ina pussaivladad preziusa da tadlar il renumnà scriptur ladin Dumenic Andry ch’è oriund da Ramosch. El scriva Impuls gia dapi l’onn 2005 ed ina da sias publicaziuns da prosa curta e lirica è il cudesch Uondas. Dal rest ha Dumenic Andry quest onn survegnì il «Premi svizzer da litteratura» per ses tom da lirica Sablun. Plinavant vegn la Samedrina Sara Francesca Hermann a preleger en stiva a Schlarigna. Ella è actura, fa part da la cumpagnia da teater «Mummenschanz» e scriva dapi l’onn 2016 Impuls.

Era il segund um dal quartet empermettent – il Sursilvan Martin Cantieni – scriva dapi il 2016 per l’emissiun Impuls. Uschiglio studegia Martin Cantieni filosofia - la quala è era savens in tema en ses texts litterars. La quarta autura dal quartet che prelegia ses Impuls en stiva a Schlarigna è Bettina Secchi. Ella è oriunda da Zuoz, viva e lavura però dapi l'onn 1996 a Locarno. Per l’emissiun Impuls scriva ella dapi l’onn 2004 e quai cun magari in tic italianità.

La setavla ed ultima lectura da «Sin il viv!» ha lieu dumengia, ils 4 da november 2018 a las 10:30, durant ils «Dis da Litteratura» en il salun da coiffeur «Haaratelier» a Domat. Là legian Carlo Beer, Plinio Meyer, Myriam Pelican e Jessica Zuan Impuls che raquintan da las rimas tranter las lingias, dal scriver per il surviver, da la frisura da chignon u da glieud cun pail sin ils dents. La turnea che vegn moderada da Flurina Badel è publica, l’entrada libra.