Siglir tar il cuntegn

Medias 2018 Novas moderaturas per «Telesguard» e «Minisguard»

L’emissiun d’infurmaziun «Telesguard» e l’emissiun d’infurmaziun per uffants «Minisguard» da RTR survegnan duas novas fatschas. A partir dal matg 2018 cumpletteschan Oceana Galmarini e Nina Defuns il team da moderaziun da la Televisiun rumantscha.

Oceana Galmarini è la nova moderatura dal «Telesguard».
Legenda: Oceana Galmarini è la nova moderatura dal «Telesguard». RTR

Oceana Galmarini, 24, oriunda d’Ardez, è redactura da «Battaporta» e moderatura/redactura da l’emissiun d’infurmaziun per uffants «Minisguard». Ella lavura dapi il 2013 tar RTR ed ha frequentà la scola da schurnalissem MAZ a Lucerna. Il 2016 ha Oceana Galmarini plinavant lavurà sco praticanta tar la «Rundschau», l’emissiun da politica ed economia da SRF. Sper la moderaziun tar il «Telesguard» resta Oceana Galmarini redactura da «Battaporta», «Minisguard» e dal «Profil».

Gievgia, ils 17-05-2018 moderescha Oceana Galmarini l’emprima giada il «Telesguard» e cumplettescha uschia il team da Isabella Wieland, Corina Schmed e Livio Foffa. Oceana Galmarini daventa successura dad Annina Campell che ha bandunà RTR per la fin d’avrigl 2018.

Moderaziun «Minisguard»:
Nina Defuns è la nova fatscha dal «Minisguard». Ella ha 22 onns, è oriunda da Trun e lavura dapi il 2016 tar RTR. Nina Defuns è actualmain stagiaire/redactura dal «Telesguard» e frequenta la scola da schurnalissem MAZ a Lucerna.

Fin ussa activa davos la camera, fa ella la fin da matg il pass davant la camera. La sonda, ils 26-05-2018, ha Nina Defuns la premiera sco moderatura da l’emissiun «Minisguard» e vegn a moderar quella lura regularmain. Sco successura dad Oceana Galmarini cumplettescha ella il team da «Minisguard». cun Elin Batista ed Ivo Orlik. Sper la moderaziun dal «Minisguard» resta Nina Defuns redactura dal «Telesguard».