Tge è pedofilia insumma? Ina malsogna u ina disposiziun sexuala? Cura daventa in carstgaun pedofil? Quants pedofils datti tar nus en il Grischun? E co pudess ins impedir meglier che uffants vegnan malduvrads? RTR va en la «zona grischa» da la pedofilia e tschenta tut quellas dumondas a psicologs, a la polizia, ad in’unfrenda da violenza sexuala – ed a in um pedofil. Dentant betg be quai, la dumonda centrala da la documentaziun è numnadamain er, co che nus sco societad stuessan ir enturn cun il tema pedofilia. E per dar resposta a quella dumonda, èn pliras persunas stadas prontas d’agir sco public da test, sco spievel per la societad. Il resultat è ina documentaziun «interactiva», da la reportra da RTR Sabrina Bundi, che pledenta directamain er il public a chasa ed animescha quel da far patratgs davart in tema, sur dal qual ins na vul atgnamain betg discurrer.
In exempel: RTR fa in quint per chattar or quants pedofils ch’i dat en il Grischun. Il quint sa basa sin stimaziuns dal project tudestg cun il num «kein-taeter-werden.de» che di che var 1% umens sajan pedofils. Dentant adatg: Pedofilia datti en differentas intensitads: 1% da la populaziun ha fantasia cun uffants, quai che na munta betg ch’els daventan er delinquents. Da tut ils pedofils fan tranter 25 e 50% propi in delict, vul dir abus sexual u consumeschan pornografia d’uffants. Sch’ins transferescha quai sin il Grischun, munta quai che quai ch’i dat p.ex. a Mustér 2 enfin 4 delinquents pedofils, a Scuol er 2 enfin 4, a San Murezzan 5 enfin 10, a Savognin 1 enfin 2, a Cuira 34 enfin 68.
Dentant pensar uss che pedofils sajan forsa quels tipics umens enturn ils 50 che sa schluitan enturn plazzas da gieu, fiss fallà, perquai che la documentaziun mussa er: pedofilia po tutgar mintgina e mintgin, la psicologia parta da l’idea che la disposiziun sexuala sa sviluppescha gia en il venter da la mamma. Pedofilas pon esser dal reminent er dunnas – in exempel datti d’udir a moda e maniera fitg directa da Philipp Gurt, ch’è vegnì malduvrà dad ina da sias persunas da tgira en la chasa d’orfans a Cuira.
«Per mai èsi stà in project enorm interessant, dentant era cun intginas sfidas. Cunzunt survegnir persunas che discurran davart il tema publicamain n'è betg stà uschè simpel», di Sabrina Bundi, reportra da RTR.
La documentaziun s’avischina or da differentas perspectivas ad in tema dispitaivel ed emprova da mussar plirs aspects d’in fatg ch’exista er en nossa societad. Da guardar e tadlar datti la «zona grischa» ed autras infurmaziuns davart la tematica a partir dals 16-10-2020 sin rtr.ch.
Sabrina Bundi ha realisà questa documentaziun per RTR en il rom dal program da svilup e furmaziun che la chasa da medias rumantscha porscha a collavuraturas e collavuraturs. Tranter auter fa era la seria da web «Metta da fein» da Flavio Deflorin part da quest program da scolaziun.