Naginas visitas en ospitals e chasas d'attempads. Lavurar davent da chasa. Scolas serradas. Il coronavirus metta il mintgadi sin il chau. Perquai stgaffescha RTR cuminanza cun in'ura speziala al radio sut il motto “Ensemen cun vus”. L’emissiun vegn emessa mintga di tranter las 11:00 e las 12:00. Audituras ed auditurs pon telefonar, salidar, engraziar, giavischar musica, dumandar e raquintar da lur situaziun actuala.
Acziuns da solidaritad – Annunzia da servetschs sin rtr.ch
Tgi che porscha servetschs da tuttas sorts per gidar a persunas ch'èn periclitadas dal coronavirus e ston ussa restar a chasa, pon annunziar quests servetschs a multimedia@rtr.ch. La survista dals servetschs è da chattar a partir d’immediat sin la pagina rtr.ch.
«La Svizra di grazia» - Acziun da solidaritad
Las chasas da medias da Ringier, NZZ, TX Group, CH Media e la SRG SSR han lantschà ina acziun per dir grazia al persunal medicinal. Venderdi, ils 20-03-2020 a las 12:30 splatscha l’entira Svizra per 60 segundas ils mauns per engraziar a l’entir persunal che lavura el sectur da la medischina per lur cumbat cunter il coronavirus. Mintgina e mintgin po participar: Splatschar u filmar l’acziun e parter ella cun ils pleds #lasvizradiGRAZIA.
Dapli musica svizra tar RTR
La cumpart da la musica svizra en ils programs da Radio RTR munta gia oz a 53% - da quai è 35% musica grischuna. Dapi onns dat la musica grischuna e rumantscha il tun tar RTR. Passa 11'000 registraziuns e producziuns da musica en las pli diversas spartas ha RTR realisà dapi il 1950. Per sustegnair interpretas ed interprets svizzers vegn RTR anc ad augmentar – la nua ch’igl è pussaivel - questa cumpart il proxim temp.
Concerts digitals
Il mument èn concerts e prelecziuns publicas scumandadas. Temps dirs per artists ed artistas, ma er per ils fans da concerts. Perquai porscha RTR «cultura digitala» ed emetta concerts en furma digitala. Mintga saira a las 7 e 7 divertescha in’artista u in artist cun sia musica il public sin rtr.ch e sin ils chanals socials. Lantschada è la seria vegnida cun musica da Mattiu Defuns e Pascal Gamboni. Ils 19-03 suonda in concert cun Gianni Tschenett ed ils 20-03 cun Chiara. Il public ha la pussaivladad da giavischar via las plattafurmas digitalas lur chanzuns preferidas.
Cuntrasts spezial: Co vai cun Vus? – Grischunas e Grischuns sut il giuf dal coronavirus
Il coronavirus ha mess schah mat la vita publica. Ina situaziun extrema e dischagreabla per tuts e tuttas. Igl ha num da tegnair distanza in da l’auter, da star a chasa, da lavurar a chasa, tegnair a chasa ils uffants. Ed ustarias e lieus publics èn serrads. «Co vai cun Vus?» quai han trais teams da RTR vulì savair ed èn perquai sa mess en viadi en las regiuns grischunas. Co passentan Grischunas e Grischuns il temp a chasa, regia tema, sa tegnan els vi da las recumandaziuns da las autoritads u regia la lungurella? Cuntrasts, uss dumengia saira a las 17:25 sin SRF1.
Per ils pitschens
Sin rtr.ch/uffants chattan uffants e geniturs ina sfugliera cun videos, versets ed istorgias en tut ils idioms. La purschida cumpiglia tranter auter 10 episodas da la famiglia Babulin, 12 filmins dals Super Bio Heros, in film da 90 minutas da Molly Monster ed anc bler auter.Tgi che vul po trametter a RTR chanzuns e versets d’uffants sco text, video ubain audio. Sin rtr.ch/scola chattan uffants pli gronds tocs explicativs, in lexicon A-Z, videos da Helveticus che decleran l’istorgia da la Svizra, emissiuns da Filosofix e gieus auditivs. RTR vegn a publitgar en il decurs da las proximas emnas regularmain dapli material per pitschens e gronds.
L’emissiun d’infurmaziun «Minisguard» che vegn emessa mintgamai sonda a las 17:40 sin SRF1 tematisescha novitads regiunalas, naziunalas ed internaziunalas e rapporta a moda clera, chapibla e divertenta dal mund da la politica, economia, cultura e societad. Ils uffants emprendan uschia en maniera nuncumplitgada da chapir meglier las novitads ed ils fatgs da lur conturns e da l’entir mund. Ils tocs explicativs èn era da chattar en il lexicon digital sin rtr.ch/uffants.
Stgazis culturals or da l’archiv
L’archiv da RTR è la memoria audiovisuala da la Svizra rumantscha e cumpiglia oz radund 36’000 videos e 18’000 audios publitgads. L’archiv è in bain cultural, ina funtauna che promova identitad e schientscha per l’atgna istorgia ed ina fanestra per interessads. Durant las proximas emnas preschentan ils archivaris e l’archivara da RTR lur perlas e recumandaziuns or da l’archiv regularmain sin rtr.ch/play.
Temp per sfegliar en vegls albums? Mintg’istorgia è unica e preziusa. I renda da nudar quella. Cun nossaistorgia.ch ha RTR creà ina plattafurma bilingua (rum/tud) ed interactiva, sin la quala ins po registrar a moda simpla istorgias, fotos, videos ed audios e parter quels cun auters. Tut quai ch’ins dovra, per che la memoria grischuna creschia cuntinuadamain èn: Ina lingia d’internet ed in’adressa dad e-mail.