Siglir tar il cuntegn

Header

cuntegn

Medias 2020 Dachasa en privel – violenza en las atgnas quatter paraids

Ni il parc stgir, ni la garascha sutterrana, ni il sutpassadi desert – il lieu il pli privlus per ina dunna è a chasa. Quai mussan las statisticas - era per il Grischun. RTR sa metta sin ils fastizs d’in tema tabuisà e rapporta la proxima fin d’emna davart violenza sin rtr.ch.

La statistica criminala dal Grischun mussa: Duas persunas èn vegnidas mazzadas l’onn 2019 en Grischun – e tuts dus mazzaments èn capitads en las atgnas quatter paraids. Tut en tut ha registrà la polizia grischuna 196 cas da violenza a chasa. E quai èn be ils cas che vegnan enfin tar la polizia. Ina part considerabla, uschia calculeschan expertas ed experts, resta en il stgir.

«Igl è da prender il tabu da la tematica»

«Igl è in tema enorm impurtant», di «Selina» en il film dals «Cuntrasts» da RTR. Perquai veglia ella er raquintar sia istorgia, «igl è da prender il tabu da la tematica». «Selina» n’è betg il vair num da la dunna – sia istorgia è dentant vaira. «Selina» ha oz passa 45 onns. Ella ha inscuntrà la violenza gia da poppa. Fin tar sia adolescenza è ella vegnida malduvrada e pitgada da ses bab. «Marie» (42 onns) n’avess mai pensà tge fin che sia lètg prenda cun suttascriver il contract da nozza. Lura era ses um ina persuna amiaivla cun spiert avert. Plaun plaunet sa schluita en lur mintgadi violenza psichica ed economica ed a la fin era violenza corporala: «El ma vuleva mo per sasez e per nagin auter.» Oz è «Marie» divorziada, viva dentant en tema.

«La violenza a chasa pertutga a nus tuts»

Annemarie Grünig vegn confruntada di per di cun istorgias sco quellas da «Marie» e «Selina». Ella maina la Chasa da dunnas dal Grischun. L’onn 2019 ha quella dà suttetg segir a rodund 24 dunnas cun 24 uffants. Pli che 150 giadas han las dunnas da la Chasa da dunnas er cusseglià via telefon ubain durant in inscunter direct. Per la «Marella» ha Annemarie Grünig fatg in’excepziun e laschà visitar RTR la Chasa da dunnas. La manadra da la Chasa da dunnas è persvadida: «La violenza a chasa va tiers a nus tuts». Questa «Marella» datti d’udir dumengia, ils 22-11-2020 a las 09:00 al Radio RTR.

«Sche jau sun bun da persvader l’um datti ina victima pli pauc»

En sia lavur sco cussegliader per persunas violentas inscuntra Roman Grenal l’autra vart – las persunas ch’èn violentas. Radund ina ventgina da questas persunas, per la pli gronda part umens, visitan il cussegliader mintg’onn. «Betg bleras, gea» di Roman Grenal sin dumonda dal «Telesguard». Tar sia lavur quintia dentant mintga success 100 pertschient: «Sche jau sun bun da persvader l’um datti ina victima pli pauc».

Violenza en las atgnas quatter paraids – tut la rapportaziun da RTR davart la tematica datti da tadlar e guardar a partir da venderdi sin rtr.ch.

Cuntrasts dals 22-11-2020

Artitgels legids il pli savens