Siglir tar il cuntegn

Header

3 persunas cun ina camera, in telefonin ed in microfon
Legenda: RTR
cuntegn

En atgna chaussa Sfidas e transfurmaziun pertutgan era RTR

La transfurmaziun da la SRG SSR, la reducziun d’entradas commerzialas e las sfidas dal martgà da medias tutgan er RTR. Enfin il 2024 sto RTR spargnar tenor la situaziun actuala radund 1.5 milliuns francs.

RTR sto adattar la purschida publicistica al consum da medias che sa mida fermamain. Damai ch'il diever da las plattafurmas digitalas s'augmenta ed il consum dal public sa mida, duain era il cuntegn, la producziun e la distribuziun s'adattar. La strategia prevesa a lunga vista in equiliber dal cuntegn linear e digital - pia da radio, televisiun ed online. Per cuntanscher la finamira da spargn vegni ad esser inevitabel d'era reducir plazzas da lavur. Enfin il 2024 quinta RTR d'avair rodund 10 plazzas da lavur cumplainas pli pauc envers il 2019. Questa reducziun duai succeder ils proxims quatter onns via fluctuaziun natirala. Las midadas èn mo pussaivlas cun ina transfurmaziun e cun sa focusar anc pli fitg sin l'incumbensa centrala, la legitimaziun, sin ils basegns dal public, l'abilitad dal persunal e sin la plivalur da la chasa da medias rumantscha.

Cuntegn audiovisual, impurtant e relevant per la Svizra rumantscha ed il Grischun

RTR duai esser #alpulsdalGrischun e rapportar anc pli fitg da schabetgs, istorgias che fatschentan e pertutgan la populaziun. Sco chasa da medias rumantscha è RTR in lieu d'inscunter per Rumantschas e Rumantschs en il Grischun, en Svizra e sin tut il mund. Grazia als chanals da radio, televisiun, online e social po RTR animar la cuminanza e manar ensemen singulas gruppas aifer la Svizra rumantscha - sur tut las generaziuns ora. Quai vala era per ils cuntegns. Uschia vegn RTR ad investir supplementarmain en formats digitals sco p.ex. en serias web sco «Metta da fein», en podcasts per giuven e vegl ubain en formats da divertiment ed infurmaziun. Quai natiralmain cun mantegnair ils chanals classics da radio e televisiun e cun nizzegiar collavuraziuns e cooperaziuns sco p.ex. cun la Fundaziun Medias Rumantschas (FMR).

L'offerta rumantscha duai esser accessibla sin diversas plattafurmas

Las disas dal public ed il consum da medias sa midan. Ils giuvens consumeschan lur cuntegn adina dapli en furma digitala e sin diversas plattafurmas ubain apparats. I dat adina dapli chanals e l'attenziun dal public per in singul product sa sminuescha. La finamira da RTR è ch'il cuntegn e la purschida chattan ses public e ch'il public ama quel. Tge cuntegns chatta la populaziun sin tge plattafurmas? Da questa tematica vegn RTR a s'occupar en il futur anc pli fitg. Quest atun lantscha la SRG SSR per exempel sia nova plattafurma da streaming «Play Suisse» sin la quala era cuntegns da RTR vegnan ad esser visibels. Qua chatta il public films, serias e documentaziuns, reportaschas e perlas or da l'archiv en lingua originala cun suttitels tudestgs, franzos e talians. Ina selecziun da contribuziuns è disponibla er cun suttitels rumantschs.

Novas tecnologias pussibiliteschan process pli simpels

Sper il public, il persunal e las plattafurmas furma era la tecnologia ina pitga impurtanta. La tecnologia nova permetta ina producziun audiovisuala pli simpla. Tras las novas pussaivladads vegn la cumplexitad da la producziun reducida ed uschia po RTR era sbassar a lunga vista ils custs da producziun. Novas tecnologias sco «speech-to-text» gidan RTR en la lavur da mintgadi. Per ils linguatgs gronds sa chapeschi da sasez - la transcripziun da pled en text scrit. La persuna discurra, il computer scriva. Per il rumantsch anc betg. RTR è sin buna via da realisar questa tecnica per il rumantsch. Grazia a questas novas pussaivladads tecnologicas e cun sustegn da l'intelligenza artifiziala sa RTR en il futur era far accessibel pli simpel (suttitels/translaziuns) e pli chapaivel sia purschida a l'entira populaziun dal Grischun.

Artitgels legids il pli savens

Scrollar a sanestra Scrollar a dretga