Siglir tar il cuntegn

Header

cuntegn

Medias 2020 Fora da stad? Betg tar RTR

La stad è medialmain in temp cun in’agenda pli leva, in temp dad ir autras vias che durant il rest da l’onn. Uschia porscha RTR questa stad in program spezial. Il program da stad cumenza glindesdi, ils 29 da zercladur 2020 e cuntinuescha fin dumengia, ils 16 d’avust 2020.

Tge è il spezial vi da Bever? E tge è unic en il vitg da Lumbrein? Durant la stad scuvran las redacturas ed ils redacturs da RTR cun l’acziun da stad «Tes vitg – tia istorgia» durant set emnas set vitgs en il Grischun. RTR emprenda d’enconuscher ils vitgs, sias istorgias e sia glieud a maun dad inputs ed ideas da la glieud che viva en ils lieus che vegnan visitads. Sper Bever e Lumbrein, visita RTR er ils vitgs da Casti, Ftan, Panaduz, Rueun e Ziràn-Reschen.

Cura è RTR cun «Tes vitg – tia istorgia» nua?

29.06. – 03.07. Rueun
06.07. – 10.07. Bever
13.07. – 17.07. Ftan
20.07. – 24.07. Casti
27.07. – 31.07. Ziràn-Reschen
03.08. – 07.08. Lumbrein
10.08. – 14.08. Panaduz

Il public da RTR è envidà e dumandà da trametter istorgias, caracteristicas ed atgnadads da quels set vitgs. Dapli infurmaziuns sa chattan sin rtr.ch/stad.

«Sil punct»: in’emissiun curta, frestga e sin il punct
L’emissiun da televisiun «Sil punct» infurmescha e tegna sin il current er durant questa stad. Tras l’emissiun mainan Donatella Bonifazi, Livio Chistell, Livio Foffa e Corina Schmed. A moda viva e cumpacta vegn rapportà da quai che capita en Svizra Rumantscha ed en il Grischun. «Sil punct» vegn emess durant la stad da glindesdi fin venderdi, a las 17:45 sin SRF1.

«Sin viadi cun Profil»: in program per il cor
Durant la stad substituescha l’emissiun «Sin viadi cun Profil» l’emissiun «Profil». Differentas persunas preschentan e raquintan da lur viadis u temps ch’ellas han passentà en lieus nunusitads. Quels viadis pon esser a l’ester, ma er en Svizra, si d’alp, en ina tegia SAC u insanua auter. «Sin viadi cun Profil» vegn emess durant la stad mintga sonda a partir da las 09:00 al Radio RTR.

«Vita e cretta»: in program per l’olma
En l’emissiun «Vita e cretta» vegn filosofà durant 5 enfin 10 minutas davart temas da la vita. Ils giasts en l’emissiun n’èn betg explicitamain persunas che sa fatschentan professiunalmain cun filosofia u cun religiun. Quai pon esser artists, sportistas, politichers sco era auters ed autras. Dumondas pon esser «Exista Dieu?», «Daco sun jau sin il mund?», «Tge è nagut?» u «Co vegnan patratgs en mes chau?». Sper il tema filosofic restan las novitads religiusas ed era il pled sin via. «Vita e cretta» vegn emess durant la stad mintga dumengia a partir da las 08.00 al Radio RTR.

«Cuntrasts»: in program che mussa il process da natiralisaziun en Svizra
Ils «Cuntrasts» da questa stad sa fatschentan cun l’ester. En il fanadur emetta RTR sco represa trais purtrets da Rumantschas e Rumantschs che vivan a l’ester. Daco èn els avant onns ids en Engalterra, Ungaria u en l’Africa dal Sid e tge fan els oz? A partir dals 26 da fanadur emetta RTR alura la nova seria naziunala «La fabrique des Suisse – Far Svizzers – La fabrica dei Svizzeri – Schweizer machen». En quatter episodas a 45 minutas dat questa seria in’invista fitg intima en il process da natiralisaziun en Svizra. Tge ston ins far e savair a Lugano, Freienbach, Losanna e Puntraschigna, sch’ins vul daventar Svizzer u Svizra? RTR ha accumpagnà a persunas e famiglias che han fatg la dumonda per obtegnair in pass cotschen e per l’emprima giada avran er las cumissiuns da natiralisaziun lur portas. Passassan era nus cun success ils examens a scrit ed a bucca? RTR emetta sco l’emprima questa seria naziunala, l’ atun è quella lura era da vesair sin RSI, RTS ed SRF. «Cuntrasts» vegn durant la stad emess mintga dumengia, enfin e cun ils 19-07 a las 17:25 ed a partir dals 26-07 a las 17:10, sin SRF1.

«Marella»: kino per las ureglias
La «Marella» porscha er questa stad represas d’emissiuns remartgablas dals ultims trais onns – emissiuns ch’èn s’approfundadas en tematicas istoricas, culturalas u economicas. L’emissiun «Marella» vegn sco usità emessa mintga dumengia a partir da las 09:00 al Radio RTR.

«Tge chaussas»: trenament geografic per il chau
Durant la stad na tschertga RTR betg ina chaussa, mabain in vitg en il chantun Grischun. Il vitg po esser grond u pitschen, avair in chastè u ina plazza da campar, esser prominent u top secret. Sco usità survegnan nossas audituras e noss auditurs mintgamai trais chavazzins, cun ils quals els han d'empruvar dad engiavinar il vitg tschertgà. Il gieu «Tge chaussas» vegn giugà durant la stad da glindesdi fin venderdi adina a las 09:45 e la fin d’emna a las 10:45 al Radio RTR.

L’entir program da stad da RTR è sco adina accessibel online sin rtr.ch, sin las plattafurmas socialas ed en l’app Play RTR.

Artitgels legids il pli savens

Scrollar a sanestra Scrollar a dretga