Siglir tar il cuntegn

Header

cuntegn

Medias 2020 Impuls «live» da Susch

Tschaffen da tadlar? Impuls prelegids là, nua che l’emissiun vegn uschiglio tadlada. Quell’occasiun sa porscha dumengia, ils 23-08-2020 a las 16:00, en la Giardinaria Müller a Susch. Las scripturas Rut Plouda e Carin Caduff vegnan a preleger live ensemen cun il scriptur Dumenic Andry lur Impuls.

Suenter il success da la turnea da lectura «Sin il viv!», realisada l’onn 2018 per festegiar ils 25 onns da l’emissiun Impuls, envida RTR puspè a lecturas d’impuls «live». Sut il titel «Impuls en gir» vegnan realisadas lecturas d’impuls en lieus dal mintgadi da las audituras e dals auditurs dal Radio RTR. Il tact inizial vegn dà quest onn dumengia, ils 23 d’avust 2020 a las 16:00, en l’orticultura Giardinaria Müller a Susch.

En l’orticultura vegnan las duas auturas Rut Plouda e Carin Caduff ensemen cun l’autur Dumenic Andry a preleger texts novs e vegls, divertents e trists sur d’amaturas da fluras en il 7avel tschiel, da cumbattants da zerclim desperads u d’anecdotas da visitas en orticulturas.

Ils dus auturs engiadinais Rut Plouda e Dumenic Andry scrivan Impuls dapi blers onns ed han tuts dus er publitgà cudeschs cun collecziuns da texts che eran oriundamain scrits per l’emissiun Impuls. La Lumneziana Carin Caduff ha fatg ses emprims pass litterars en il public cun scriver Impuls e publitgescha uss prosa e lirica.

La prelecziun vegn moderada da Flurina Badel, l’entrada è libra e l’occurrenza publica, ma cun plazzas limitadas causa Covid19.

L’emissiun Impuls da RTR

Avrir la box Serrar la box

Di per di, dapi l’onn 1993, emetta RTR l’emissiun Impuls, in patratg per cumenzar il di da las audituras e dals auditurs da radio. Istorgias vairas u bain inventadas. Texts leghers, poetics, trists, experimentals, meditativs, critics e savens cun ina nota persunala. Cun ils onns èn ils Impuls quasi daventads in agen gener litterar rumantsch, e la rubrica ha survegnì ina impurtanta muntada en la promoziun da la litteratura rumantscha.

Artitgels legids il pli savens