Medias 2020 - Nicolas Pernet daventa directur da RTR

Il cussegl d'administraziun da la SRG SSR elegia la direcziun da RTR. Quai fa el sin proposta da la SRG SSR Svizra Rumantscha (SRG.R) e tenor cunvegnientscha cun il directur general da la SRG SSR Gilles Marchand. Nicolas Pernet ha persvas ils commembers da la cumissiun en la procedura da nominaziun d'ina vart cun sia vasta experientscha da blers onns en la cuntrada mediala, da l'autra vart cun sia cumpetenza strategica, sia persunalitad, sia moda da pensar analitica e cun ses sensori per las sfidas che spetgan il service public medial da la Svizra rumantscha en in martgà ch'è linguisticamain fitg fragmentà.

Nicolas Pernet, 40, surpiglia la direcziun da RTR tenor cunvegnientscha cun sia patruna actuala. Enfin lura maina vinavant l'interpresa Pius Paulin, 61. Paulin ha surpiglià interimisticamain la direcziun per la fin dal 2019. L'organisaziun da la surdada vegn definida las proximas emnas ensemen cun il directur general da la SRG SSR Gilles Marchand.

Nicolas Pernet è naschì il 1979 a Sent en la vischnanca da Scuol en l'Engiadina Bassa. Suenter avair frequentà l'Institut autalpin Ftan ha el studegià scienza d'economia da manaschi a l'Universitad da Son Gagl (HSG) ed ha promovì il 2010, suenter segiurns a l'ester a l'University of Michigan ed a l'École des Hautes Études Commerciales de Paris, danovamain a la HSG.

A partir dal 2010 ha el lavurà sco manader da project svilup da l'interpresa per Digital Business tar l'interpresa da medias Ringier, è daventà là manader da project en l'office da CEO, ha surpiglià l'onn 2013 tar Ringier la direcziun dal marketing da la gruppa Blick, è daventà il settember 2016 manader da Publishing & News Business da questa gruppa ed è dapi l'avrigl 2020 ses Head of Commercial Management. Nicolas Pernet è maridà e bab da dus uffants.

Vincent Augustin, president da la SRG Svizra Rumantscha e commember dal cussegl d'administraziun da la SRG SSR: «La SRG.R ha pudì eleger tranter candidatas e candidats fitg qualifitgads. Jau sun però persvas: nus avain fatg ina fitg buna tscherna ed jau ma legrel sin la collavuraziun cun Nicolas Pernet, tant tar RTR sco er en il cussegl d'administraziun da la SRG SSR.»

Gilles Marchand, directur general da la SRG SSR: «Jau ma legrel d'astgar beneventar Nicolas Pernet sco nov commember da la direcziun da la SRG SSR. Sias enconuschientschas professiunalas e sias experientschas fatgas en la cuntrada mediala svizra vegnan ad esser da grond avantatg en questa fasa da transfurmaziun da la SRG SSR e consequentamain era da RTR. A Pius Paulin engraziel jau gia oz per ses grond engaschi premurà per RTR. Enfin la surdada d'uffizi hai jau era vinavant cumplaina confidenza en el.»

Nicolas Pernet davart sia elecziun: «Sco Grischun cun corp ed olma ma legrel jau fitg da pudair surpigliar la direcziun da RTR e da m'engaschar en questa funcziun per in ferm service public medial en Svizra.»