Gian-Marco Maissen (27) è creschì si a Puntraschigna ed ha cumenzà l’avust 2013 tar RTR sco praticant/stagiaire e reporter dal Radio RTR. Il 2016 ha el retschet il diplom da schurnalissem da la MAZ a Lucerna ed ha dapli lura lavurà sco redactur e moderatur tar il Radio RTR. Dapi il 2017 lavura el en la redacziun giuvna da Battaporta/Minisguard e per il team da social media.
«Uffants tschentan las pli bellas dumondas. Ellas èn sinceras e directas. Mintgatant simplas da respunder e mintgatant fitg cumplexas. Il Minisguard declera exact questas grondas e pitschnas dumondas da la vita. Jau hai grond gust da pudair en futur respunder als uffants uschia bleras dumondas sco mo pussibel», di Gian-Marco Maissen, nov moderatur Minisguard.
Il «Minisguard» è l’emissiun d’infurmaziun da RTR per uffants. Mintga sonda a las 17:40 sin SRF1, online sin rtr.ch/minisguard ubain sin YouTube survegnan ils uffants ina survista da quai ch’è succedì en lur regiun, en il chantun, en Svizra, a l’exteriur e da quai che occupa il mund. Tge capita cun ils peschs sch'il chametg dat en l'aua? Pertge san las flurs e las plantas cura ch'ellas han da flurir? Tge è il coronavirus? Daco ston ins far home-schooling? U co sa furma insumma granella? Las redacturas ed ils moderaturs elavuran gist da questas dumondas u era temas relevants da la politica, la cultura e dal sport u dal mund d’uffants uschia ch’uffants da la scola primara san suandar e chapir quels. Gian-Marco Maissen cumplettescha il team da moderaziun dal Minisguard enturn Elin Batista e Nina Defuns.