Siglir tar il cuntegn

Header

cuntegn

Medias 2020 Peda per prosa: In podcast litterar da RTR

AmaturAs da la litteratura rumantscha na ston betg desister dal tut sin novas litteraras, era sch’ils «Dis da litteratura» n’han betg lieu. RTR preschenta il podcast «Peda per prosa» cun perlas litteraras da Viola Cadruvi, Romana Ganzoni, Jürg Gautschi, Rut Plouda, Leo Tuor e Dumenic Andry.

Las sis emprimas episodas dal nov podcast litterar «Peda per prosa» èn raquints novs u pli vegls elegids da Flurina Badel, la redactura da l’emissiun Impuls da RTR. Els han ina lunghezza da 10-25 minutas e vegnan legids da lur auturas ed auturs. Gist plirs scripturs rumantschs renumnads sur ils cunfins da la Rumantschia han mess a disposiziun in text che stat a cor ad els. Uschia dat il scriptur sursilvan Leo Tuor per l’emprima giada invista en ses pli nov raquint anc en lavur cun il titel «Robinson en Rezia». El prelegia in extract da quel text ch’è tipic Tuor: scrit spess e cun purtrets intensivs che demussan la pussanza da la litteratura.

In omagi cun profunditad poetica ed umur raffinà al postin, è il raquint da la scriptura engiadinaisa Romana Ganzoni. L’autura ha tschernì «Il postin», perquai che las postinas ed ils postins èn las unicas persunas che mainan anc mintga di persunalmain ed en furma fisica novas dal mund exteriur fin davant l’isch-chasa en quests temps da distanza sociala pervia dal virus. Il raquint cun stil subtil dal scriptur engiadinais Dumenic Andry «Il quart sudà» porta il suttitel «üna skizza ramoschana» e maina en il vitg da sia uffanza, en stanza da scola cun la magistra sensibla Luisa Famos.

Rut Plouda maina cun stil concis reducì a l’essenzial tras in univers profund e poetic. Ella preschenta il raquint pli lung «Da giallinas e turpchentschas», in text sur da giaglinas e sur dal scriver. La pli giuvna autura che contribuescha a «Peda per prosa» è la scriptura empermettenta Viola Cadruvi. La fin d’october è cumpari ses emprim cudesch cun istorgias fatalas, scrittas en rumantsch grischun. Tranter quellas istorgias è er «La curridra», in text che va sut la pel, scrit plain tensiun e cun nota surreala. La sisavla episoda dal podcast vegn cumplettada cun il raquint «Time out» da l’autur Jürg Gautschi. El raquinta in’istorgia tragicomica sur d’in um, che passenta vacanzas malgartegiadas en tenda.

Il podcast «Peda per prosa» datti d’udir a partir dals 6 da november sin rtr.ch, spotify, iTunes e Google Play.

Artitgels legids il pli savens