Siglir tar il cuntegn

Header

Il dus novs moderaturs Livio Chistell e Donatella Bonifazzi.
Legenda: Ils dus novs moderaturs: Livio Chistell e Donatella Bonifazi. RTR
cuntegn

Medias 2020 Vent frestg en las moderaziuns da RTR

L’emissiun d’infurmaziun «Telesguard» da Radiotelevisiun Svizra Rumantscha (RTR) survegn duas novas fatschas. A partir da l’avrigl 2020 cumpletteschan Donatella Bonifazi e Livio Chistell il team da moderaziun.

A partir da l’avrigl cumpletteschan Donatella Bonifazi e Livio Chistell il team da moderaziun dal «Telesguard» da RTR. Els surprendan la successiun dad Isabella Wieland che ha moderà durant 15 onns l’emissiun d’infurmaziun e dad Oceana Galmarini che ha midà tar SRF.

Donatella Bonifazi (26) è creschida si a Cuira ed ha cumenzà l’avust 2016 tar RTR sco praticanta e stagiaire en la redacziun dal «Telesguard». Il 2019 ha ella retschet il diplom da schurnalissem da la MAZ a Lucerna e lavura dapi lura sco redactura tar il «Telesguard». Sia emprima emissiun vegn ella a moderar ils 7 d’avrigl 2020.

«Jau ma legrel sin mia nova sfida sco moderatura dal «Telesguard». Uschia daventa mia lavur da mintgadi en la redacziun anc pli variada ed interessanta. Per mai è quai ina cumbinaziun perfetga.», di Donatella Bonifazi, moderatura TSG

Livio Chistell ha 26 onns, è da Flond ed ha cumenzà l’avust 2014 tar RTR sco praticant e stagiaire en la redacziun «Minisguard/Battaporta». Il 2017 ha el retschet il diplom da schurnalissem da la MAZ a Lucerna ed è dapi lura en la squadra da «Minisguard/Battaporta». Livio Chistell lavura - sper sia nova incumbensa tar il «Telesguard», nua ch’el è da vesair l’emprima giada ils 3 d’avrigl 2020 - vinavant per la redacziun «Minisguard/Battaporta».

Els dus cumpletteschan uschia il team cun Livio Foffa e Corina Schmed.

Moderaziun dubla tar Radio RTR
Infurmativ, autentic e divertent – quests pleds-clav descrivan tenor la retschertga tar il public da RTR la nova furma da moderaziun da l’emissiun da la damaun. Dapi l’entschatta d’october 2019 vegn l’emissiun da la damaun tranter las 06:00 e las 09:00 numnadamain co-moderada da duas persunas.

Da nov èn las suandantas moderaturas ed ils suandants moderaturs d’udir la bun’ura al radio: Livio Foffa, Sergio Guetg, Georgina Janki, Ladina Schena e Tobia Valär. Els vegnan sustegnids da Flurin Clalüna, Gaby Degonda, Angela Hendry, Marionna Lombriser, Tona Poltera e Natalia Weber sco co-moderaturas e co-moderaturs. Sper questa nova furma da moderaziun vegn mess da nov mintga bun’ura in focus tematic ed il public vegn entretschà pli fitg en l’emissiun.