Siglir tar il cuntegn

Header

Gianni Tschenett il chantadur
Legenda: RTR
cuntegn

Communicaziun a las medias Talent da Schlarigna: Gianni Tschenett e ses Top Pop Rumantsch

RTR preschenta il nov «Top Pop Rumantsch». Il giuven entusiast da musica engiadinais, Gianni Tschenett, e sia band «Oak Street» èn ils protagonists da la 48avla ediziun. «Tschêl blov» vegn preschentà venderdi, ils 26 da mars 2021, a las 11:00 live tar Radio RTR.

Gia sco buob da set onns ha Gianni Tschenett cumenzà a far musica. Quella passiun n’ha fin uss, in decenni e mez pli tard, anc betg bandunà el. Il giuven da Schlarigna ha fin oz sunà en diversas bands. Tranter auter er en la band «Airo» che aveva cuntanschì il final dal bandXost il 2018. In onn pli tard lura ha el gudagnà ina registraziun per il Top Pop Rumantsch da RTR. Il resultat, cun in zic retard causa corona, è la 48avla ediziun «Tschêl blov».

Tge è il insumma Top Pop Rumantsch?

Il Top Pop Rumantsch è ina seria da producziuns da musica actuala, lantschada da RTR l’onn 2005. L’idea è da promover la chanzun rumantscha, da sustegnair e scuvrir giuvens talents da musica cun dar ad els la pussaivladad da realisar ina producziun iniziala en in conturn professiunal ed alura preschentar questa chanzun via ils chanals da RTR ad in public vast.

L’encreschadetgna e la musica autentica

Sco tema principal da sia chanzun ha Gianni Tschenett elegì in grond favurit da la musica rumantscha: l’encreschadetgna. Il tschiel blau che manca, sch’ins è en la tschajera da la Bassa. Dentant era sche la cuntrada, la famiglia ed ils amis mancan, dessan ins betg avair nauscha luna, mabain avair plaschair ch’ins po adina puspè turnar en ses dachasa. Uschia daventa la chanzun er ina decleraziun d’amur a sia patria, l’Engiadina.

Per mai èsi impurtant che la musica è autentica e che l’acustica constat.
Autur: Gianni Tschenettchantautur

Perquai na chattan ins nagins instruments rinforzads en ses Top Pop Rumantsch. Ghitarras acusticas, in banjo ed ina battaria accumpognan sia vusch. La cumbinaziun da la melodia, che Gianni Tschenett ha gia cumponì avant trais onns, e dal text rumantsch creeschan ina tut atgna colur. Dal reminent èsi l’emprima giada che Gianni ha insumma scrit ina chanzun en rumantsch. Per l’emprima giada en l’istorgia dal Top Pop Rumantsch è Philippe Laffer cun sia fatschenta «Alterna Records» il producent responsabel per la producziun. Laffer è oriund da Basilea ed abitescha a Morissen.

Sgol musical en grondas autezzas

Il mument mussa Gianni Tschenett en ina scola da freestyle co far trics sin skis en l’aria. Far in sgol en grondas autezzas vul el er en sia carriera musicala. El è s’annunzià tar differentas scolas autas da musica cun il giavisch da pudair cumenzar bainprest in studi da musica. Fin lura vul el scriver, cumponer ed oravant tut sunar live sia musica. La proxima chaschun ha el venderdi, ils 26 da mars 2021 tranter las 11:00 e las 12:00 en il studio da Radio RTR. Da tadlar datti la nova chanzun alura era sin rtr.ch/musica.

Top Pop Rumantsch dals 26-03-2021 a las 11:00

Artitgels legids il pli savens

Scrollar a sanestra Scrollar a dretga