Il 2006 ha RTR dischlocà en la chasa da medias actuala ed unì las redacziuns da radio e televisiun. Ussa, 15 onns pli tard, èsi uras da renovar la tecnica installada da lez temp. RTR ha nizzegià la pussaivladad d'adattar l'organisaziun da las redacziuns e da render fitta ella per il mund digital.
«Il nov studio da radio RTR ha survegnì colur frestga ed ina cumparsa pli giuvna. El duai reflectar la diversitad da noss temas, ma era quella da nossa lingua e noss idioms. Il connex cun la regiun e cun la rapportaziun locala, che resta era en il futur in element central, vegn simbolisà tras il lain. Il nov studio porscha a las moderaturas ed als moderaturs la pussaivladad da lavurar cun ina tecnica pli effizienta e da sa concentrar pli fitg sin las moderaziuns», explitgescha Tamara Deflorin, scheffa communicaziun e marketing. Il studio è vegnì realisà en collavuraziun cun il designer da sets Rico Chiari e cun la partiziun Equipament da SRF.
L'istorgia en il center
Il studio da radio mida dal plaunterren al plaun intermediar, nua che las redacziuns dad audio e da video han gia lur plaz. «Il nov studio da radio RTR pussibilitescha vias pli curtas ed ina collavuraziun pli intensiva e pli directa tranter las differentas redacziuns. Nus profitain anc meglier da las enconuschientschas vicendaivlas ed ils temas pon vegnir coordinads a moda optimala. Nossas schurnalistas e noss schurnalists elavuran oz contribuziuns e cuntegns per plirs chanals e betg mo per in sulet sco pli baud. Grazia a la reorganisaziun ed al studio da radio adattà, pudain nus metter anc pli fitg en il center l'istorgia», declera il schefredactur Flavio Bundi la renovaziun.
Enfin la fin da l'onn realisescha RTR anc in ulteriur studio en las localitads da l'anteriur studio da radio. En la nova «lounge RTR» duain lura vegnir producids surtut cuntegns per ils chanals online e per ils pli divers basegns dal public. Quest studio facilitescha da producir contribuziuns dad audio e video. A medem temp duai la «lounge RTR» esser in spazi per intervistas, visitas guidadas, lavuratoris, preschentaziuns ed occurrenzas cun public.
