Siglir tar il cuntegn

Header

cuntegn

Medias 2021 Purschida da films e serias rumantschas sin Play Suisse

Tschaffen da guardar films ubain serias svizras per rumantsch? Lura èsi da dar in cuc sin la plattafurma da streaming Play Suisse. Ensemen cun las ulteriuras unitads da la SRG SSR ha RTR lantschà questa plattafurma ed amplifitgescha la purschida rumantscha d’in cuntin.

Radund trais mais suenter la lantschada da la nova plattafurma da streaming Play Suisse èn disponiblas radund 120 contribuziuns per rumantsch ubain cun suttitels rumantschs.

Uschia pon ins chattar films premiads sco «Mia vita da zucchini» (original «Ma vie de Courgette») a partir d’immediat cun suttitels rumantschs. In film che tracta dad Icare che viva persul cun sia mamma che numna el «Zucchini». Durant che Icare gioga cun las stgatlas da biera da sia mamma alcoholicra, succeda in grev accident che mida per adina la vita dal mattet da nov onns.

Il film «Frontaliers disaster» represchenta la cumedia italofona sin la plattafurma da streaming. Roberto Bussenghi è in da blers frontaliers che passan di per di il cunfin per pudair lavurar en Svizra. Pervi da la guardia da cunfin Loris J. Bernasconi vegn el però regularmain memia tard. Il destin vul che ils dus inimis natirals vegnan sfurzads a co-exister.

Ad amantas ed amants da films istorics porscha Play Suisse il film davart la perforaziun dal «Gottard». In film svizzer che raquinta l’istorgia da l’emprim tunnel ch’è vegnì construì a partir da l’onn 1872 tras las Alps.

Ma co activar ils suttitels ubain midar la lingua? Ils suttitels rumantschs pon ins activar cun guardar il film en il player e cun far in clic sin il simbol da nivletta sutvart a dretga. Silsuenter s’avra ina fanestra, nua ch’ins po activar ils suttitels ubain midar la lingua.

Cuntegn rumantsch per uffants e giuvens da spiert

Il film «Molly Monster» tematisescha las midadas che stattan avant porta tar la pitschna Molly, cur che la famiglia crescha. Sper quest film da 70 minutas empermettan er ils 52 filmins da «Helveticus» cun lur cuntegn instructiv intgins muments d’aha. En duas staflas vegnan tractads eveniments, atgnadads e persunalitads da la Svizra. Era tgi che s’interessa per animals e natira na vegn betg a la curta. En la seria «Super Bio Heroes» vegnan purtretads dudesch insects ed animalets indigens – ils campiuns da la biodiversitad.

Sper offertas per uffants porscha la plattafurma radund 80 episodas da l’emissiun «Cuntrasts» e la seria naziunala «Far Svizzers». En quatter episodas dat questa seria in’invista fitg intima en il process da natiralisaziun en Svizra. Sper questas documentaziuns èn sa chapescha era da vesair l’emprim film rumantsch «Amur senza fin» e l’emprima seria rumantscha «Metta da fein».

Artitgels legids il pli savens

Scrollar a sanestra Scrollar a dretga