Tge spetga Vus?
RTR preschenta las professiuns e mussa la lavur concreta en ils studios. Co far radio e televisiun? Co vegnan las contribuziuns realisadas ch’ins vesa ed auda mintga di? Las emissiuns vegnan producidas live per e cun Vus e tgi che vul po collavurar davos la camera u al microfon.
La societad purtadra SRG.R porscha a Vus durant la sonda lunga la pussaivladad da dar troccas en cumpagnia.
Fufragnar en l'archiv
Igl è pussaivel da far ina retschertga davart in lieu preferì en il Grischun u da tschertgar istorgias veglias en l’archiv. Pertge betg guardar, sch’ins n’è eventualmain betg sez perpetnisà en ina contribuziun da radio u televisiun? Visitadras e visitaders pon far retschertgas ed er chargiar agens videos u fotos sin la plattafurma «nossaistorgia.ch».
Zambregiar in radio DAB+
Uffants ch’èn pli vegls che 8 onns pon construir durant la «Sonda lunga» lur agen radio DAB+ tar RTR e silsuenter prender quel a chasa. Ils workshops da bajegiar radios DAB+ entschaivan mintgamai a las 12:30, 14:30 ed a las 16:30. Annunzias pon vegnir fatgas il di da l'occurrenza direct al retschaviment.
Musica dals ultims 35 onns
Sa chapescha na dastga er la musica betg mancar durant ina tala occurrenza. En il rom dal giubileum da «35 onns producziun da musica RTR» guardain nus sin 35 onns musica rumantscha. Durant pitschens concerts da mintgamai 35 minutas vegnan preschentadas – e quai «live sur place» – ivettas or dal grond archiv da musica da RTR.
Ils concerts en survista:
- 16:00 Benedetto Vigne e Paulin Nuotclà, Bulais, Mattiu Defuns
- 18:00 Hades, Passiunai, Saskia Demarmels (primaudiziun dal 47. Top Pop Rumantsch)
- 19:00 Corin Curschellas, Tartaruga, Liricas Analas
Nus ans legrain da Vossa visita.