Il film «Gisula Tscharner – la terra pli datiers ch’il tschiel» è in purtret subtil dad ina dunna cun in agen chau en ina societad en transfurmaziun.
En ils onns 1990 ha Gisula Tscharner cumenzà cun far rituals ordaifer la baselgia. La plipart dals carstgauns en Svizra crajan vid insatge superiur, ma van en baselgia sin il pli da Nadal u en situaziuns da crisa. «Quellas persunas crajan vid insatge ed han il basegn da celebrar muments da transiziun », di Gisula Tscharner. «Ellas tschertgan la dimensiun mistica da la vita.»
Cuschina selvadia cun ervas localas
Gisula Tscharner cumbinescha en sia lavur la spiritualitad cun sia cuschina da las dunnas selvadias, la WildeWeiberKüche. Ella enconuscha ervas selvadias sco paucs, ha creà recepts, scrit cudeschs e dà curs da cuschinar. Il divin na vegnia per ella betg da sisum, ma da la terra: «La savida da la vita è bler pli veglia che l’idea dal divin dal tschiel.»
Suenter la premiera envida RTR ad in apero or da la cuschina selvadia da Gisula Tscharner.
Moderaziun: Anna Serarda Campell
Entrada libra.