EditurA da video

Edituras ed editurs da video èn responsabels per l’elavuraziun da producziuns da video.

EditurA da video

2:58 min, dals 30.1.2015

Dal material furnì da schurnalistas, glieud da la camera ed operaturs da tun taglian e monteschan edituras ed editurs da video contribuziuns prontas per l’emissiun. Els/ellas cusseglian las incumbensadras/ils incumbensaders en dumondas da concepziun, dramaturgia, tecnica e ritmus da tagl. Il champ da lavur tanscha da la reportascha actuala sur emissiuns da magazin e da sport, documentaziuns, soaps e films da kino enfin a producziuns multimedialas.

EditurAs da video dovran per lur lavur differenta software da tagliar e d’elavurar. Els/ellas enconuschan las pussaivladads tecnicas e pon applitgar quellas a moda adequata. Els/ellas enconuschan las tendenzas actualas dal linguatg figurativ ed applitgeschan quellas per concepir las contribuziuns.

En in emprim pass da lavur vegnan tschernidas sequenzas da maletgs che vegnan alura ordinadas, scursanidas e restructuradas. Plaun a plaun sa furma dals fragments in entir armonic che sto satisfar a tschertas pretensiuns esteticas. Alura vegnan animads ed inserids elements grafics, p.ex. titels, curregì la colur da las singulas sequenzas e sonorisà e maschadà las contribuziuns da maletg finidas.

EditurA da video Avrir maletg en lightbox.

Legenda da maletgs: EditurA da video rtr

Edituras da video ston savens lavurar sut grond squitsch da temp per in termin d’emissiun fix. Quai pretenda d’esser versà en il diever da la tecnica e da pudair decider spert. Editurs sustegnan las auturas ed ils auturs da chattar soluziuns creativas e persvadentas per lur product. Per la lavur al plaz da tagliar dovri ina concentraziun maximala. Edituras da video registreschan ed analiseschan a medem temp infurmaziuns formalas e tematicas. La lavur constanta al monitur e la massa da maletgs chaschunan in grond squitsch fisic e psichic.