ModeraturA televisiun

Las fatschas – la carta da visita regiunala e naziunala che represchentan las emissiuns da la Televisiun Rumantscha.

Dumondas a Maria Victoria Haas, moderatura televisiun

Tge rolla ha la moderatura da televisiun tar RTR?

Moderatura da televisiun Maria Victoria Haas en il studio da televisiun. Avrir maletg en lightbox.

Legenda da maletgs: Allegra charas aspectaturas e chars aspectaturs ... RTR

La moderatura è la fatscha da RTR e da la televisiun rumantscha. Sia lavur è dad esser in liom tranter la redacziun ed ils aspectaturs. La rolla è er da far gust a la glieud cura ch’i guardan l’emissiun u insumma da guardar l’emissiun e las contribuziun. La moderatura guarda che las contribuziuns dals redacturs e da las redacturas vegnan tar ils aspectaturs e las aspectaturas. Perquai che dad ella vesan ins per il solit mo il num a la fin e betg la persuna. Plinavant ha la moderatura da manar tras l’emissiun senza irritaziuns per che tuts chapeschan tut e ch’i dettia ina emissiun radunda.

Quant fitg influenzescha la moderatura in’emissiun da televisiun?

Mintga moderatura ha ses agen stil e ses agen linguatg che dat mintgamai in’autra tempra a l’emissiun. Tar nus è quai ferm il cas cun rumantsch da Domat, puter e sursilvan. E lura ha mintgina er in auter stil da tschantschar, da far las moderaziuns ed er da far discurs. La moderatura na influenzescha dentant betg mo cun sia persuna il maletg da l’emissiun. Ella porta numnadamain er sco tut ils redacturas e las redacturas ses inputs e sias ideas tge ch’ins pudess far, per exempel er propostas per dumondas ch’ins pudess tschentar als giasts en il studio.

Co è questa professiun sa midada ils davos onns?

Purtret da las moderaturas da TVR. Avrir maletg en lightbox.

Legenda da maletgs: Las moderaturas da TVR. RTR

Igl è sa midà relativ bler. A l’entschatta na vegniva il Telesguard betg fatg live. Avant insaquants onns na devi er nagin teleprompter. La moderatura stueva dir tut las moderaziuns ordadora. Per quels che na savevan betg far quai uschè bain, stuevan ins lura scriver sin cedels e tegnair si sut la camera. Il teleprompter e las emissiuns live èn stadas las grondas midadas dals davos onns. Era il studio è sa midà cuntinuadamain, oz moderain nus ord in studio hiper-modern che porscha bler dapli pussaivladads che quel da pli baud .Uschiglio hai dà tar nus plitost pitschnas midadas sco per exempel che nus faschain uss er anc facebook e twitter ina u duas giadas per di.

Co vesa in tipic di da lavur da la moderatura da televisiun ora?

Noss di da lavur cumenza a las 8.30 cun la sesida da redacziun. Là vegnan discutads tut ils temas per l’emissiun da quai di ed er per ils proxims dis. I vegn discurrì sur dad inputs per temas ch’ins savess lura far contribuziuns il proxim temp. E lura vegn anc fatg ina critica sur da l’emissiun dal di avant. Quella sesida cuzza ca. 20 minutas, ina mes’ura. Suenter entschaiva la lavur, cun far il trailer per il radio che vegn emess sin mezdi cun noss temas per far in pau gust. Cura ch’il trailer è fatg vegnan las moderaziuns scrittas. Là èsi era da guardar cun la redactura ed il/la producent/a per che la moderaziun giaja bain ensemen cun la contribuziun. Sin las 15.00 datti la recepziun cun il/la producent/a che prenda giu/dat l’ok per tut mes texts da moderaziun e sin las 15.30 vom jau lura en la mascra. Suenter èsi da controllar ils texts da translaziun che vegnan da Turitg per il teletext e laschar ir enavos las correcturas. Lura resta anc in zic temp per sa preparar, stampar moderaziuns e forsa anc ina giada ir curt en la mascra. A las 17.10 suonda suenter ina curta sesida l’emprova en il studio ed a las 17.20 lura l’emissiun. Ed insacura durant il di èsi anc da far facebook e twitter.

Tge èn las bellas varts da questa lavur e tgeninas las main bellas?

Victoria Haas fa ina intervista cun in giast. Avrir maletg en lightbox.

Legenda da maletgs: Dar la plattafurma al giast. RTR

Atgnamain datti mo bellas varts. A mai plascha il star avant la camera, jau vai gugent quai „kick“ cura ch’igl è live ed jau sai: ussa sto tut esser perfect. Plinavant emprendan ins d’enconuscher ina massa glieud che vegnan en il studio u a differentas occurrenzas. Ed ins emprenda er ina massa sur da tut ils differents temas perquai che nus avain ina emissiun fitg vasta, cun sport, economia, cultura e tut. Fitg bel è sa chapescha er sch’ins è ì insanua en la regiun ed ha lura questa interacziun cun ils aspectaturs e las aspectaturas. Quai dat adina fitg bels inscunters.

E na datti mai situaziuns da stress?

Cura ch’igl è live èsi adina in stress. Quai è adina in pau tensiun sch’i funcziunescha tut, surtut quellas emissiuns nua ch’igl è gist capità insatge quai di ch’ins ha stuì metter enturn l’entira emissiun, tuts han stuì currer e vegnan enavos tard. In pau dapli stress sai era dar a chaschun da dis da grondas votaziuns sch’ils giasts vegnan fitg tard, u sch’ins n’ha anc betg tut las infos e tut è malruassaivel. Dentant quai tutga tiers e fa er fitg interessant l’entira chaussa.

Tge premissas sto la persuna ademplir che s’interessescha per questa plazza?

Ins sto esser ina persuna fitg communicativa, quai è fitg impurtant. Lura ston ins er s’interessar per tut, gist per il Telesguard perquai che nus avain tut ils temas en noss’emissiun. Esser avert per tut, era da sa fatschentar cun temas che n’interesseschan forsa betg l’emprim mument. Plinavant ston ins avair sco moderatura in bun linguatg ed esser fitg segir da sa preschentar. In tschert carisma, in expressiun positiva e simpatica che la glieud guarda lura simplamain gugent na dastga er betg mancar. E la finala ston ins er savair ir enturn cun in tschert squitsch/stress – live han ins mo ina schanza.

Tge perspectivas professiunalas ha la moderatura da televisiun tar RTR?

Ins po per exempel era lavurar sco redactura e far contribuziuns. Mintgatant datti er emissiuns da radio u concerts ch’ins sa moderar. Per quels che fan bleras contribuziuns ed han rimnà bleras experientschas datti er la pussaivladad da daventar producent. Quai èn uschia las pussaivladads ch’i dat en chasa. Lura datti er bleras pussaivladads da lavurar ord chasa p. ex. moderaziuns da concerts, discussiuns da podium, festas ed acts festivs sco il premi da film svizzer ed anc bler auter. Per quellas che fan gugent quai, èn quai fitg bellas experientschas.