RedacturA novitads

Adina esser al puls da l’actualitad, avair la survista da quai che capita local, regiunal e naziunal e mantegnair sang fraid en situaziuns da hectica.

Dumondas a Corina Schmed, redactura newsdesk

Tge rolla ha la redactura da novitads tar RTR?

Redactura da novitads Corina Schmed moderescha. Avrir maletg en lightbox.

Legenda da maletgs: Cura che la glisch cotschna glischa ha i num esser pront. RTR

La redactura ed il redactur da novitads èn responsabels per ils bulletins da novitads che van mintg'ura respectivamain mintga mes'ura sur l'emettur. Las novitads che capitan ora en il mund ed en las regiuns arrivan via agenturas u er communicaziuns da medias. Qua decida e tscherna la redactura lura per gronda part sez, tgeninas ch'el/ella tscherna per ses bulletin. Emprima prioritad han dentant adina las chaussas che capitan e pertutgan il chantun e las regiuns grischunas. Qua vegnan tschertas novitads magari er furnidas da las collavuraturas e dals collavuraturs ora en las regiuns.

Quant fitg influenzescha la redactura da novitads in’emissiun?

Noss'influenza è relativamain gronda. Quai cunzunt sch’ins resguarda il fatg ch’i dat sco detg mintg’ura ubain mintga mes’ura novitads al radio. Plinavant na prepara la redactura betg mo las novitads, mabain prelegia era sezza ellas al microfon. Quai munta ch’ella è pia er d’udir live al radio.

Co è questa professiun sa midada ils davos onns?

Il mund da las novitads è segiramain daventà pli spert ils ultims onns - quai ch'è d'attribuir al svilup digital. Oz po mintgin s'infurmar e leger tge che capita ora en il mund - e quai adina e dapertut. Las novitads al radio n’èn per blers betg pli la pli impurtanta via da s’infurmar tge che curra e passa. Cunquai vivan las novitads er main ditg u perdan pli spert l'actualitad.

Co vesa in tipic di da lavur da la redactur/a da novitads ora?

Redactura da novitads al plaz da lavur. Avrir maletg en lightbox.

Legenda da maletgs: Mintga bulletin da novitads sa cumpona da 6-8 novitads. RTR

Il di da lavur da la redactura da novitads cumenza tut tenor servetsch la damaun a las 3.30, a las 9.30 u il suentermezdi a las 15.30. A l'entschatta u er avant il servetsch s'infurmescha la redactura tge ch'è capità da nov e s'infurmescha tge ch'è annunzià per quest di. Quai capita en emprima lingia via agenturas, mails u er gasettas sco er en discurs cun il/la redactur/a che ha gì il servetsch avant. Lura èsi da selecziunar, formular e transponer las novitads (en rumantsch grischun) per l'emissiun che suonda. E punct l'ura plaina sto la redactura esser semtgada al pult da novitads per leger quellas al microfon. Aifer il di da servetsch sa sviluppeschan tschertas novitads, autras perdan l'actualitad e vegnan remplazzadas da pli actualas. Uschia sa midan u sa sviluppeschan lura er las emissiuns da novitads.

Tgeninas en las bellas e tgeninas las main bellas varts da questa lavur?

Sco redactura da novitads sun jau adina sin il current tge che curra e passa ora en il mund, en Svizra ed en la regiun e quai davent da la politica, l'economia, la cultura ed il sport. Mintga di poss jau emplenir mes satgados cun in zic dapli savida. Jau appreziesch d'esser fitg autonoma e da l'autra vart tuttina d’esser en in team che sa fatschenta cun la medema materia. Forsa in zic main bel: Mia lavur è dictada dal temp, quai che procura mintgatant per situaziuns da stress e hectica. Qua èsi impurtant da savair sa concentrar sin l'essenzial e da mantegnair in chau cler.

Tge premissas sto la persuna ademplir che s’interessescha per questa plazza?

L'interess per fatgs politics, socials ed economics è ina da las premissas impurtantas. In'affinitad per la lingua è segiramain d'avantatg. Redacturs e redacturas da novitads ston savair ir enturn cun situaziuns da stress ed esser prontAs dad er lavurar irregularmain, vul dir la notg u er la fin d'emna.

Tge perspectivas professiunalas ha la redactura da novitads tar RTR?

CollavuraturAs dal newsdesk han bunas premissas per er lavurar sco reportra e reporter da radio. Vegn l'experientscha vitiers pon els er lavurar sco producentA che porta lura la responsabladad per tut ils cuntegns che van sur l’emettur.