RedacturA radio

Esser là nua che l’actualitad capita ed avair il nas per istorgias. Tgirar il contact cun la populaziun e marcar preschientscha en la regiun tutgan tar la lavur da tschep da mintga redactura e redactur regiunal.

Dumondas ad Anna Caprez, redactura regiunala radio

Tge rolla ha la redactura regiunala tar RTR?

Redactura da radio Anna Caprez avant il studio regiunal. Avrir maletg en lightbox.

Legenda da maletgs: Redactura da radio Anna Caprez. RTR

La redactura regiunala ha da rapportar independentamain davart tut quai che occupa e muventa las persunas che vivan en la regiun. Cun quai che la redactura regiunala viva er sezza en la regiun, è il contact cun la populaziun pli facil ed ella vegn er a savair plitost tut quai che capita en las vals.

Quant fitg influenzescha la redactura regiunala in’emissiun?

La redactura regiunala è tut tenor basegn buna da porscher in’entira paletta da contribuziuns davart in tema. Er rapportar live davart in’occurrenza cun suns e tuns tutga tar sia lavur. Tut tenor quant bler che capita en sia regiun influenzescha a redactura regiunala pli pauc u pli fitg in’emissiun cun pli bleras u pli paucas contribuziuns.

Co è questa professiun sa midada ils davos onns?

Tut è daventà pli svelt! Ozendi ha ina redactura da rapportar en differentas manieras davart ina tematica. Cumenzà cun l’intervista che ha da vegnir elavurada, sur ina fotografia u in clip da video, in text che annunzia la contribuziun, fin tar la publicaziun online.

Co vesa in tipic di da lavur da la redactura regiunala ora?

I na dat betg in tipic di da lavur da la redactura regiunala! Cun quai ch’ella rapporta davart tut las tematicas pussaivlas, datti er uras da lavur particularas. Per exempel la damaun baud per accumpagnar ina lavur speziala u lura la saira tard per rapportar davart ina radunanza communala. Il redactur è savens en gir per esser tar la glieud e tar quai che capita.

Tgeninas èn las bellas varts da questa lavur e tgeninas las main bellas?

La redactura regiunala Anna Caprez tar la glieud, avant il bus da RTR. Avrir maletg en lightbox.

Legenda da maletgs: Sco redactura regiunala hai num ir or tranter la glieud. RTR

Il contact cun glieud da tut las direcziuns pussaivlas en differentas linguas è ina da las varts positivas da la lavur da la redactura regiunala. Ella po esser fitg datiers a las persunas e vegn a savair per part er istorgias fitg persunalas ed intimas. Da l’autra vart po ina radunanza d’in parlament regiunal esser plitost lungurusa.

Tge premissas sto la persuna ademplir che s’interessescha per questa plazza?

Sper il savair in dals 5 idioms rumantschs èn ina buna scolaziun generala, enconuschientschas da tut las tematicas pussaivlas (politica, sport, cultura...) premissas per ademplir la lavur d’ina redactura regiunala.

Tge perspectivas professiunalas ha il/la redactur/a regiunal/a tar RTR?

La redactura regiunala lavura savens sut atgna reschia ed ha da parter en il di sezza. Cun quai porta ella er gronda responsabladad, è flexibla ed è er disada da lavurar sut squitsch. Tut bunas premissas per ademplir er autras professiuns u ina sumeglianta en in’autra interpresa.