RedacturA televisiun

Rapportar da l’actualitad e raquintar istorgias cun purtrets è lur sfida quotidiana. La lavur da team gioga ina rolla centrala. Savens collavuran redacturas e redacturs cun pliras persunas sco um/dunna da camera, editurA video, tecnichistA dal tun e producentA.

Dumondas a Martina Werro, redactura da televisiun.

Tge rolla ha la redactura da televisiun tar RTR?

Redactura da televisiun Martina Werro taglia ina contribuziun. Avrir maletg en lightbox.

Legenda da maletgs: Redactura da televisiun Martina Werro. RTR

La redactura da televisiun fa contribuziuns per il Telesguard u era per il Minisguard, l’emissiun per ils uffants. Quai vul dir, la redactura è responsabla per il cuntegn da quellas contribuziuns. L’incumbensa da la redactura da televisiun è da sa lavurar en in tema e tschertgar l’ istorgia davostiers ed alura ils maletgs vitiers che van a prà cun quai che la redactura vul dir. La finamira è che l’ istorgia funcziunescha a la fin era mo cun ils purtrets senza ils pleds vitiers. Quai è auter en cumparegliaziun cun il redactur da radio che raquinta sia istorgia mo cun pleds.

Quant fitg influenzescha la redactura da televisiun in’emissiun?

Mintgamai en la sesida da redacziun la damaun pon ils redacturs far inputs ed uschia influenzar directamain ils cuntegns da l’emissiun. Natiralmain ch’ins emprova da vender ils agens temas uschè bain sco pussaivel per pudair far quai ch’interessa ins persunalmain il pli fitg. Plinavant pon ins era cun il stil co ins lavura e co ins vul raquintar in’ istorgia influenzar fitg l’emissiun. Tar il Minisgurad è il redactur savens responsabel per tut ils cuntegns da l’emissiun ed ha uschia fitg bleras libertads. Tar il Telesguard perencunter datti er adina temas che ston vegnir fatgs, saja quai pervi da l’actualitad u perquai ch’il producent vul in tschert tema.

Co è questa professiun sa midada ils davos onns ?

Sa midada è cunzunt la sparta da multimedia . Quai vul dir che nus stuain er ponderar co exportar ils cuntegns per nossa app «PlayRTR» ubain er co far reclama sin facebook per quai che vegn lura la saira en il Telesguard. Plinavant avain nus era cumenzà a far pli e pli bler sez sco per ex. filmar e suenter tagliar il material. Quai munta che la redactura da televisiun lavura pli e pli savens er senza equipa spezialisada.

Co vesa in tipic di da lavur da la redactura da televisiun ora?

Redactur da televisiun sin via. Avrir maletg en lightbox.

Legenda da maletgs: Redactur da televisiun sin via. RTR

In di propi tipic na datti betg. Il bler èsi las 08.30 sesida. Là vai per l’emissiun, tge vegn en l’emissiun e tgi fa tge. Lura survegn la redactura in tema ed ha peda per far retschertgas e coordinar termins per intervistas. Auter che tar il radio sto la redactura da televisiun ir ord chasa e na po betg far in’intervista per telefon. Suentermezdi vai alura il bler da far ina filmada ch’igl è suenter da tagliar. Las 17.40 va lura la contribuziun finida sur l’emettur. Mintgatant ha la redactura dentant era temp plirs dis per ina contribuziun, quai è different. Uschia datti dis ch’ins è mo ord chasa vid filmar ed auters nua ch’ins è principalmain en biro vida telefonar u tagliar.

Tgeninas èn las bellas varts da questa lavur e tgeninas las main bellas?

Il bel èn ils inscunters ch’ins ha cun la glieud ch’ins va a filmar. Jau pens adina: Ins stat avant ina chasa, avra ina porta e dastga guardar en ina vita. Lura ves’ins quai, fa la contribuziun, serra puspè la porta e va tar la proxima. la redactura da televisiun ha propi invista en bleras chaussas. Bel è er la lavur en il team cun umens/dunnas da camera e da tun. Main bels en per mai quels dis nua che jau sun mo en biro ed emprov da pudair tiers glieud, ma nagin che prenda giu il telefon u vul prender posiziun. Da quels dis van ins lura magari ord chasa la saira senza propi ver fatg insatge er sch’ins ha pudì sclerir ina massa chaussas. Quels dis tutgan dentant era tiers. Jau hai pli gugent sche jau hai a la fin in product, pia ina contribuziun.

Tge premissas sto la persuna ademplir che s’interessescha per questa plazza?

Ins sto esser avert , avair in tschert egl / sentiment per maletgs, esser mirveglius ed avair ina tscherta basa da savida generala. Ins sto er savair ir enturn cun il fatg ch’ins na sa la damaun magari betg tge ch’ins ha da far e sto avair la saira in product. Mintgatant èsi era in pau in squitsch. la redactura da televisiun sto esser flexibla ed avair da far gugent cun glieud. Ina buna basa linguistica è segir er d’avantatg.

Tge perspectivas professiunalas ha la redactura da televisiun tar RTR?

Cun il temp e l’experientscha è in pass segir da daventar producenta ch’è lura responsabla per l’entira emissiun. Uschiglio datti er anc la varianta da daventar moderatura da televisiun – quai ch’è per blers/as in «highlight». Ubain daventar redactura da radio, pia midar sparta intern. Quai è era adina puspè pussaivel. E tut tenor datti er la pussaivladad da midar tar la sora gronda SRF.