SchurnalistA

Schurnalistas e schurnalist fan retschertgas, selecziuneschan infurmaziuns, interpreteschan e scrivan surlonder artitgels, commentaris e reportaschas u creeschan contribuziuns da radio e da televisiun.

SchurnalistA

2:34 min, dals 30.1.2015

Ils accents principals da la lavur schurnalistica pon variar, tut tenor il medium, la grondezza da l’interpresa e la funcziun. La basa fundamentala da quest’activitad resta però da retschertgar e da transmetter infurmaziuns ad in public definì resp. da render accessiblas infurmaziuns relevantas ch’èn d’interess per la publicitad. A las sedutas da redacziun ch’han lieu mintga di sa reunescha l’entira equipa redacziunala per discutar ils temas che s’imponan per la proxima ediziun sin fundament d’eveniments actuals. Alura vegn decidì tgi che scriva sur da tge. Las schurnalistas ed ils schurnalists procuran per las infurmaziuns davart lur tema, fan retschertgas e cumenzan alura – savens sut grond squitsch – a scriver l’artitgel resp. a concepir la contribuziun da radio u da televisiun, tegnend adina en egl il public en mira. Il tema duai vegnir intermedià uschia ch’el è chapibel per il public avisà.

Las qualitads che caracteriseschan in bun schurnalist/ina buna schurnalista èn sias mirveglias, sia persistenza, sia cumpetenza linguistica ed in’abilitad da communitgar extraordinaria. El/ella sto discurrer cun la glieud ed era ristgar da far dumondas malempernaivlas per vegnir tar sias infurmaziuns.

Intervista cun in sportist. Avrir maletg en lightbox.

Legenda da maletgs: Intervista cun in sportist. RTR

La lavur schurnalistica includa betg mo scriver artitgels, reporta-schas u commentaris, mabain era rediger annunzias d’agentura e texts da correspundentas u da collavuraturs libers. Quests texts vegnan elavurads, curregids e, sche necessari, scursanids. Schurnalistas e schurnalista da radio e da televisiun èn per il solit era responsabels per il material illustrativ resp. il material da tun che vegn registrà ensemen cun ina squadra al lieu. Las contri-buziuns duain esser d’auta qualitad infurmativa, redigidas a moda precisa ed attractiva cun in’entschatta adattada ed ina buna fin.

Foto per SchurnalistA Avrir maletg en lightbox.

Legenda da maletgs: Schurnalists regiunals. rtr

Schurnalistas e schurnalists èn conscients da lur responsabladad visavi la publicitad. Els adempleschan d’ina vart in duair d’infurma-ziun e ston da l’autra vart pudair responsar l’infurmaziun visavi la societad. Las normas etic-professiunalas dal Cussegl da pressa svizzer furman ina basa essenziala per lur activitad.